ՀՀ երրորդ նախագահ Սերժ Սարգսյանին առանձնապես խոշոր կաշառք ստանալու և անօրինական ձեռնարկատիրությամբ զբաղվելու մեղադրանք է ներկայացվել, գործն ուղարկվել է դատարան, հայտնել է Հակակոռուպցիոն կոմիտեն։
Ըստ հրապարակման՝ Սարգսյանը 2000-2018 թվականներին զբաղեցնելով տարբեր պաշտոններ՝ նպաստել է, որպեսզի Արարատի մարզի Սուրենավան համայնքում բիտումի գործարանի հիմնադրմանը ներգրավվեն իր հետ մտերիմ հարաբերությունների մեջ գտնվող Մ. Բ.-ն և վերջինիս պատկանող կազմակերպությունները:
Հաղորդագրության մեջ նշվում է, որ Սարգսյանը նշված անձի հետ Կիպրոսում գրանցված ռուսական երկու ընկերության հետ համատեղ 2006թ. փետրվարի 20-ին հիմնադրել է նոր ընկերություն և հանձնարարել 50% բաժնեմասը ձևակերպել Մ. Բ.-ին պատկանող ընկերության անվամբ, իսկ մյուս 50% բաժնեմասի նկատմամբ գրանցվել է ռուսական երկու ընկերության սեփականության իրավունքը:
Այնուհետև պահանջել է հիմնադրված նոր ընկերության՝ Մ․Բ․-ին պատկանող բաժնեմասի 22,5%-ը որպես կաշառք փոխանցել իր եղբորորդու և ՀՀ երկրորդ նախագահ Ռոբերտ Քոչարյանի որդու հիմնադրած ընկերությանը: Կատարելով Սարգսյանի պահանջները՝ 2008թ. մարտի 14-ին Մ. Բ.-ն իր ընկերության բաժնեմասի նշված մասը ձևական գործարքի միջոցով վաճառել է ընկերությանը, ինչպես նաև նոր հիմնադրված ընկերությունում կատարել է ներդրում, նշել է Հակակոռուպցիոն կոմիտեն:
2013թ. ներդրող կազմակերպությունները նպատակադրվել են վաճառել ընկերությունում իրենց բաժնեմասերը, և Սարգսյանը հանձնարարել է Մ. Բ.-ին դիմել իր մտերիմին պատկանող բանկային կազմակերպությանը՝ 14 միլիոն դոլար վարկ ստանալու համար և վերադարձնել ռուսական երկու ընկերության կատարած ներդրումները, ինչը նա կատարել է:
Սարգսյանն այնուհետև վաճառել է նոր հիմնադրված ընկերության ակտիվները: Նա որոշել է նշված գործարքը ծառայեցնել իր դստեր ամուսնու և նրա հետ փոխկապակցված ձեռնարկատիրական գործունեություն իրականացնող կազմակերպությունների կողմից ծավալվող գործունեությանը նպաստելուն: Արդյունքում՝ Մ. Բ.-ն հիմնադրել է նոր ընկերություն, որին փոխանցվել են մյուս ընկերությունների ակտիվները, այդ թվում՝ Երևանում և մարզերում գտնվող 23 բենզալցակայան, նավթամթերքի բազա և Սուրենավան համայնքում գտնվող՝ բիտում արտադրող գործարանը, նշել են կոմիտեից։
Իրավապահների պնդմամբ՝ 2015թ. օգոստոսի 22-ին Ս. Ս.-ի դստեր ամուսնու հետ փոխկապակցված ընկերությունը 40 միլիոն դոլարով ձեռք է բերել Մ. Բ.-ի հիմնադրած նոր ընկերության 100% բաժնեմասը, ինչով պայմանավորված՝ հնարավորություն է ստացել ՀՀ բենզինային վառելիք ներկրելու մենաշնորհ ստանալ:
Ս. Ս.-ն Մ. Բ.-ից պահանջել է իր եղբորորդու և Քոչարյանի որդու ընկերությանը 22,5% բաժնեմասի դիմաց տալ առանձնապես խոշոր չափերով՝ 6 միլիոն դոլար, որից հետո Մ. Բ.-ն վերջինիս նախաձեռնությամբ իրեն ներկայացված կեղծ փոխառության պայմանագրի հիման վրա նրա ընկերությանն է փոխանցել նշված առանձնապես խոշոր չափերով գումարը:
Մայիսի 23-ին Հակակոռուպցիոն կոմիտեն Սարգսյանին մեղադրանք էր առաջադրել շուրջ 3 մլն դոլար կաշառք ստանալու համար։ 2019-ին նախկին նախագահին մեղադրանք էր առաջադրվել պետական բյուջեից շուրջ կես մլրդ դրամի հափշտակություն կազմակերպելու համար։ 2024 թվականի մայիսի 31-ին Երևանի ընդհանուր իրավասության առաջին ատյանի քրեական դատարանն արդարացրել էր Սարգսյանին՝ «վառելանյութի գործով» հանցակազմի բացակայության հիմքով։ Այդ որոշման դեմ դատախազությունը վերաքննիչ բողոք էր ներկայացրել:
Մարտի 12-ին Գլխավոր դատախազությունը հայտնել էր, որ Երևանի Իսակովի պողոտայի և «Եռաբլուր» զինվորական պանթեոնի հարակից հողատարածքների ապօրինի օտարման դեպքերի վերաբերյալ նախաձեռնված քրեական վարույթով Սարգսյանին մեղադրանք է ներկայացվել 18 դրվագ խոշոր չափի հափշտակության, 2 դրվագ խոշոր չափի փողերի լվացման, 3 դրվագ այն օժանդակելու համար: Նախկին նախագահի նկատմամբ որպես խափանման միջոց էր ընտրվել երկրից բացակայելու արգելքը:
