ՀՀ երրորդ նախագահ Սերժ Սարգսյանին մեղադրանք է առաջադրվել շուրջ 3 մլն դոլար կաշառք ստանալու համար, հայտնում է Հակակոռուպցիոն կոմիտեն:
Ըստ հաղորդագրության՝ ՀՀ նախկին նախագահը ՍՊ ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008 թվականի փետրվարին և ապրիլին գործարարից ստացել էր առանձնապես խոշոր չափերով՝ 2 985 000 դոլար կաշառք:
Մեղադրանքում նշվում է, որ 2008 թվականի փետրվարի 20-ին ՀՀ նախկին բարձրաստիճան պաշտոնյան կանխիկ եղանակով ստացել էր կաշառքի մասնաբաժինը՝ 2 660 000 դոլարը, իսկ մնացած մասն ստացել էր փոխկապակցված մի շարք անձանց օժանդակությամբ։
Նախաքննությամբ պարզվել է, որ կազմակերպվել է կաշառքի մասնաբաժնի մնացած մասը փոխկապակցված անձի միջոցով գործարարի կողմից տալու գործընթացը, որի արդյունքում՝ 2008 թվականի ապրիլի 3-ին և 21-ին նշված անձի բանկային հաշվեհամարին էր փոխանցվել համապատասխանաբար՝ 200 000 դոլար և 125 000 դոլար։ Այդ գումարով, ըստ ՀԿԿ-ի, մարվել են ՀՀ նախագահի երդմնակալության և դրան հաջորդած մի քանի օրերի ընթացքում Երևան քաղաքում անցկացված միջոցառման ժամանակ օդապարիկներ վարձակալելու, ինչպես նաև այդ միջոցառման ընթացքում ծախսված այլ գումարների ծախսերը:
Առանձնապես խոշոր չափերով կաշառք ստանալու համար ՀՀ նախագահի պաշտոնն զբաղեցրած անձին մեղադրանք է ներկայացվել ՀՀ 2003 թվականի քրեական օրենսգրքի 311-րդ հոդվածի 4-րդ մասի 2-րդ կետով (առանձնապես խոշոր չափերով կաշառք ստանալը, առավելագույն պատիժը՝ 12 տարվա ազատազրկում):
Քրեական վարույթից նրա վերաբերյալ անջատված մասով նախաքննությունն ավարտվել է: Վարույթի նյութերը մեղադրական եզրակացությամբ հանձնվել են հսկող դատախազին՝ այն հաստատելու և դատարան ուղարկելու միջնորդությամբ:
2019-ին Սարգսյանին մեղադրանք էր առաջադրվել պետական բյուջեից շուրջ կես մլրդ դրամի հափշտակություն կազմակերպելու համար։ 2024 թվականի մայիսի 31-ին Երևանի ընդհանուր իրավասության առաջին ատյանի քրեական դատարանն արդարացրել էր Սարգսյանին՝ «վառելանյութի գործով» հանցակազմի բացակայության հիմքով։ Այդ որոշման դեմ դատախազությունը վերաքննիչ բողոք էր ներկայացրել:
Մարտի 12-ին Գլխավոր դատախազությունը հայտնել էր, որ Երևանի Իսակովի պողոտայի և «Եռաբլուր» զինվորական պանթեոնի հարակից հողատարածքների ապօրինի օտարման դեպքերի վերաբերյալ նախաձեռնված քրեական վարույթով Սարգսյանին մեղադրանք է ներկայացվել 18 դրվագ խոշոր չափի հափշտակության, 2 դրվագ խոշոր չափի փողերի լվացման, 3 դրվագ այն օժանդակելու համար: Նախկին նախագահի նկատմամբ որպես խափանման միջոց էր ընտրվել երկրից բացակայելու արգելքը:
