«Տաշիր» ընկերությունների խմբի ղեկավար Սամվել Կարապետյանի դեմ ընթացող դատական գործընթացը քաղաքական հետապնդում է, հայտարարել է փաստաբան Արամ Վարդևանյանը:
«Ի տարբերություն այլ աղմկահարույց դեպքերի, քրեական գործերի՝ այս գործն ունի մի առանձնահատկություն՝ այստեղ ընդհանրապես քրեական գործ չկա: Քրեական գործ՝ կոչին վերաբերող կոչի բացակայության պայմաններում: Սա իրավական աբսուրդ է»,- ասել է Վարդևանյանը:
Նրա խոսքով՝ պաշտպանական կողմն ուղիղ փաստական ապացույցներ ունի, որոնք վկայում են քաղաքական հետապնդման մասին։ Դրանք սկսվում են այն պահից, երբ հունիսի 17-ին վարչապետ Նիկոլ Փաշինյանը Ֆեյսբուքում հրապարակմամբ սպառնացել էր հաշվեհարդար տեսնել Կարապետյանի հետ։
Վարդևանյանը նշել է, որ նույնիսկ նախաքննության մարմնի ներկայացուցիչները փաստում են, որ գործն ուղղակիորեն կապված է Կարապետյանի դիրքորոշման հետ՝ Հայ Առաքելական եկեղեցու շուրջ ծագած վիճաբանությունների առնչությամբ։
«Դատարանին ներկայացված միջնորդության մեջ բառացի առկա, որ Կարապետյանի խոսքերին նախորդել էին իրադարձություններ, այն է՝ Հայաստանի գործադիր իշխանության դիրքորոշումն Ամենայն հայոց կաթողիկոսի հրաժարականի վերաբերյալ: Սրանք քաղաքական հետապնդման ուղղակի փաստեր են»,- ընդգծել է փաստաբանը։
Նա հիշեցրել է, որ փաստաբաններն անհապաղ վերանայման՝ վերաքննիչ բողոք էին ներկայացրել, որը մակագրվել էր դատավոր Արմեն Դանիելյանին, ով, Վարդևանյանի խոսքով, կախվածություն ունի իշխող ուժից:
«Քանի որ մենք խոսում ենք քաղաքական հետապնդման մասին, տրամաբանությունը պետք է լինի դրա շրջանակներում: Բողոքը, որ մակագրվել էր Դանիելյանին, մեր կողմից հետ է վերցվում: Բացարկի միջնորդություն էր ներկայացվել, օգտագործվել բոլոր այն աղմկահարույց գործերը, որոնցով Դանիելյանի «արդարադատությունը» տեսել ենք բոլորս։ Գործընկերոջս՝ պարոն Արշակ Վարդանյանի կողմից նաև ներկայացվել էր շատ հետաքրքիր միջնորդություն, որ Դանիելյանը կախվածություն ունի իր կարիերայի աճի մեջ՝ ՔՊ խմբակցությունից, այն նույն խմբակցությունից, որն ամեն օր խոսում է Կարապետյանի մասին։ Այդ պայմաններում Դանիելյանն ինչպե՞ս կարող է անաչառ դիտորդի աչքերում ընկալվել անկախ, անաչառ, բայց ինչ կաներ Դանիելյանը, իհարկե՝ կմերժեր բացարկի միջնորդությունը»,- հավելել է նա:
Սակայն, թեև Քրեական դատավարության օրենսգիրքը պահանջում է կարճել վարույթը, ինչպես շեշտել է Վարդևանյանը, դատավորը ոչ թե դա չի արել, այլ ավելին՝ որոշման հրապարակման ամսաթիվ է նշանակել հուլիսի 4-ը։ Ըստ նրա՝ դատավորն սպասել է, որ դատախազությունն ամբողջությամբ բավարարված միջնորդության պայմաններում ներկայացնի վերաքննիչ բողոք՝ Դանիելյանին այս վարույթից չհեռանալու հնարավորություն ընձեռելու նպատակով:
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
Կարդացեք նաև
Սամվել Կարապետյանն արձագանքել է ՀԷՑ-ի բաժնետոմսերն ստանալու իշխանությունների ծրագրերի մասին լուրերին
ՀԷՑ-ի ղեկավարությունը պատմել է Երևանի էներգոհամակարգում ներդրումներ կատարելու ծրագրերի մասին
Սամվել Կարապետյանը խոսել է Երևանի կենտրոնում էլցանցի նոր համակարգ ստեղծելու ծրագրերի մասին
