Գյումրիի քաղաքապետ Վարդան Ղուկասյանի որդու՝ Սպարտակ Ղուկասյանի խափանման միջոցը փոխվել է, նրան 3 ամսով կալանավորել են։ Այս մասին Armenia Today-ը տեղեկացել է ՀՀ գլխավոր դատախազությունից։
Ղուկասյանը 2025-ի սեպտեմբերից անցնում էր շորթման հատկանիշներով հարուցված քրեական վարույթով։ Նոյեմբերին Քննչական կոմիտեից տեղեկացել էինք, որ նրա նկատմամբ հարուցվել է հանրային քրեական հետապնդում՝ մի խումբ անձանց կողմից հաղորդակցական տեխնոլոգիաներն օգտագործելու միջոցով կատարված խուլիգանություն հատկանիշով։ 2025-ի նոյեմբերին Ղուկասյանին կալանավորել էին, 2026-ի ապրիլին նրա նկատմամբ տնային կալանք էր կիրառվել։
Armenia Today-ի տեղեկություններով՝ Ղուկասյանին այժմ կալանավորել են մի խումբ անձանց կողմից հաղորդակցական տեխնոլոգիաներն օգտագործելու միջոցով կատարված խուլիգանություն հատկանիշով հարուցված վարույթի շրջանակում։ «5-րդ ալիքի» տեղեկություններով՝ նախօրեին Ղուկասյանին կալանավայր են տեղափոխել։
Ղուկասյանի խափանման միջոցի հարցը պետք է քննվեր հաջորդ ամիս, սակայն, ըստ լրատվամիջոցի, դատախազությունն արտահերթ նիստ նշանակելու միջնորդություն է ներկայացրել: Ղուկասյանի փաստաբան Հովհաննես Ղարաքեշիշյանը հաստատել է այս տեղեկությունները։ Ըստ Ղաքեշիշյանի՝ դատական նիստն անցկացվել է առանց Ղուկասյանի պաշտպանների մասնակցության:
«Ծանուցում ենք ստացել դատական նիստի նշանակման մասին, սակայն հայտնել ենք, որ չենք կարող մասնակցել՝ ծանրաբեռնվածության պատճառով»,- ասել է նա:
Փաստաբանները դեռ չեն ստացել դատարանի որոշումը:
