Գյումրիի քաղաքապետ Վարդան Ղուկասյանի որդուն՝ Սպարտակ Ղուկասյանին, իրավապահներն այսօր ձերբակալել են, Armenia Today-ին հայտնել է քաղաքապետի փաստաբան Արամայիս Հայրապետյանը։
«Չգիտեմ՝ որքանով դա կապ ունի Ղուկասյանի՝ Վերաքննիչ հակակոռուպցիոն դատարանի այսօրվա որոշման հետ, բայց․․․»,- ասել է Հայրապետյանը։
Armenia Today-ի տեղեկություններով՝ նրա գտնվելու վայրն այս պահին անհայտ է։ Նշենք, որ Ղուկասյանի որդին տնային կալանքի տակ էր։
Քննչական կոմիտեից, մեկնաբանելով Սպարտակ Ղուկասյանի ձերբակալությունը, Armenia Today-ին հայտնել են, որ նախաձեռնված քրեական վարույթի նախաքննության ընթացքում 1 անձի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով կատարված խուլիգանություն, առավելագույն պատիժը՝ 5 տարվա ազատազրկում):
Ավելի վաղ հայտնել էինք, որ դատարանը մերժել է Գյումրիի քաղաքապետին կալանքից ազատ արձակելու պաշտպանական կողմի հատուկ բողոքը։
Հոկտեմբերի 20-ի առավոտյան իրավապահները քննչական գործողություններ էին իրականացրել Գյումրիի քաղաքապետարանում, այնուհետև կաշառք պահանջելու մեղադրանքով ձերբակալել համայնքի 8 պաշտոնյայի, այդ թվում՝ Ղուկասյանին, որին դատարանը 2 ամսով կալանավորել էր հոկտեմբերի 21-ի առավոտյան։
Փաստաբանները հոկտեմբերի 26-ին հայտնել էին Ղուկասյանի դեմ քրեական օրենսգրքի 422-րդ հոդվածի 2-րդ մասով նոր գործի մասին՝ Հայաստանի «ինքնիշխանությունից հրաժարվելու հրապարակային կոչերի» համար՝ Ռուսաստանի և Բելառուսի հետ դաշինքի մասին նրա հայտարարությունների պատճառով։
