Աշխատանքի և սոցիալական հարցերի նախարար Արսեն Թորոսյանն ԱԺ-Կառավարություն հարցուպատասխանի ընթացքում հոկտեմբերի 1-ին հայտարարել էր, որ կառավարությունն առաջիկա տարում նախատեսում է 3500 դրամով բարձրացնել կենսաթոշակները։ Նախարարը նշել էր, որ քայլը միտված է նվազագույն կենսաթոշակի աստիճանական բարձրացմանը և կենսաթոշակառուների սոցիալական վիճակի բարելավմանը։
Միևնույն ժամանակ՝ հոկտեմբերի 5-ին վարչապետ Նիկոլ Փաշինյանը հայտնել էր, որ կառավարությունը պատրաստել է պետական ծառայողների աշխատավարձերի բարձրացման ծրագիր, սակայն այն դեռ չի հրապարակվում։ Փաշինյանի խոսքով՝ իշխանությունները խուսափում են հանրային բացասական արձագանքից։
Armenia Today-ի նկարահանող խումբը քաղաքացիներից հետաքրքրվել է՝ ինչպե՞ս են գնահատում կառավարության այս քայլերը, պետությունը պատշաճ կերպով հոգո՞ւմ թոշակառուների սոցիալական խնդիրները և ինչո՞վ պետք է պայմանավորված լինի պետական ծառայողների աշխատավարձի չափը։
Հարցվածների մեծամասնությունն ասել է, որ դժգոհ է կառավարության որոշումից, քանի որ Հայաստանում կենսաթոշակն այնքան ցածր է, որ թոշակառուները չեն կարողանում հոգալ իրենց կարիքները։
«Անձամբ կենսաթոշակառու եմ, բայց աշխատում եմ։ Խեղճ թոշակառուներ կան, որ կոպեկին են սպասում՝ գնան, հաց առնեն, կոմունալ մուծեն։ Աշխատավարձերի բարձրացում էլ պետք է լինի, քանի որ ամեն ինչ թանկացրել են։ 3500 դրամը շատ քիչ է, ահավոր քիչ»,- ասել է քաղաքացիներից մեկը։
Հարցման մասնակիցներից մի քանիսն էլ նշել են, որ 3500 դրամով թոշակների ավելացումը կառավարության կողմից դրական քայլ է, սակայն իրենց սպասելիքներն ավելի բարձր էին։ Նրանցից մեկը հավելել է՝ գոհ է, սակայն շատ կցանկանար, որ կառավարությունը ոչ թե 3500 դրամով բարձրացներ կենասթոշակները, այլ ամենաքիչը՝ 10 000 դրամով։
«Ինչ էլ բարձրացնեն, օգուտ է, բայց էլի չի հերիքում։ 45 000 դրամ թոշակով մի կերպ ապրում ենք»,- նշել է մեկ այլ քաղաքացի:
Մանրամասները՝ տեսանյութում։
