ՀՀ կառավարությունը հոկտեմբերի 16-ի նիստում հավանություն է տվել նախագծին, որով կարճաժամկետ աշխատանքի նպատակով Հայաստան ժամանող օտարերկրացիներն այլևս չեն կարող օգտագործել զբոսաշրջային կամ այցելության վիզան։
Ներքին գործերի նախարարության առաջարկած կարգավորմամբ աշխատանքային վիզան կդառնա պարտադիր իրավական հիմք՝ նման գործունեություն իրականացնելու և ժամանակավոր կացության կարգավիճակ ստանալու համար։
Նախագծով օտարերկրացիների կացության կարգավիճակների տրամադրման գործընթացը թվայնացվելու է։ Նախատեսվում է ստեղծել էլեկտրոնային միասնական հարթակ, որը հնարավորություն կտա օտարերկրացիներին առցանց ներկայացնել դիմումները և հետևել ընթացքին՝ առանց պետական մարմիններ այցելելու։
ՆԳՆ նախագծով աշխատանքի թույլտվության համակարգի փոխարեն ներդրվում է նաև քվոտավորման մեխանիզմ, որը թույլ կտա կառավարությանը սահմանել օտարերկրյա աշխատողների ընդունման տարեկան սահմանաչափեր՝ հաշվի առնելով շուկայի պահանջները։ Սա նշանակում է, որ կառավարությունն ամեն տարի կսահմանի, թե քանի օտարերկրացի աշխատող կարող է ներգրավվել Հայաստանի տարբեր ոլորտներում՝ ըստ երկրի տնտեսական պահանջների։
Նախարարությունն այդպիսով նպատակ ունի հստակ տարանջատել զբոսաշրջային և աշխատանքային այցերը, կանխել չարաշահումները և ապահովել աշխատանքային միգրացիայի վերահսկելիությունը։
«Նախագծի իրականացմամբ Հայաստանը կստանա ամբողջովին թվայնացված և ավելի վերահսկելի միգրացիոն համակարգ՝ նվազեցնելով չարաշահումների և կրկնակի գրանցումների ռիսկը»,- ասված է նախագծում։
Փաթեթը ներառում է նաև փոփոխություններ «Պետական տուրքի մասին» և մի շարք այլ օրենքներում՝ պարզեցնելով վճարումների կարգը և վերանայելով արտոնությունները։ Սա, ըստ կառավարության, կբարձրացնի վարչարարության արդյունավետությունը և լրացուցիչ եկամուտներ կապահովի բյուջեում։
