Վրաստանի շրջակա միջավայրի պաշտպանության և գյուղատնտեսության նախարարությունը հակադարձել է հայկական մամուլի հրապարակած տեղեկությանն այն մասին, որ հայկական ելակը, Ռուսաստան է տեղափոխվում թուրքականի անվան տակ, հայտնել է գերատեսչությունը։
«Հրապարակ» օրաթերթի հոդվածում նշվում էր, որ հայկական արտադրանքի ներմուծման սահմանափակումներից հետո որոշ արտադրողներ սկսել են ելակ արտահանել Վրաստանի միջով՝ գրանցելով որպես թուրքական։ Լրատվականի համաձայն, այս սխեման, ենթադրաբար, օգտագործում է նաև Երևանի քաղաքապետ Տիգրան Ավինյանի ընտանիքի հետ կապված որոշ ջերմոցային տնտեսություններ։
Նախարարությունը այս տեղեկատվությունը որակել է որպես իրականությանը չհամապատասխանող։
«Նախարարությունը կտրականապես հերքում է հայկական լրատվականի տարածած տեղեկատվությունը հայկական արտադրանքի ծագումը փոխելու և ՌԴ բեռներ ներմուծելու մասին՝ հարևան երկրի անվան տակ՝ վերաարտահանման նպատակով»,- ասվում է նախարարության հայտարարության մեջ։
Նախարարությունը նշել է, որ նման հաղորդագրությունները «սպեկուլյատիվ են», չեն համապատասխանում իրականությանը և կարող են վնասել երկու երկրների միջև տնտեսական հարաբերություններին։ Գերատեսչությունը նաև մտահոգություն է հայտնել, որ Վրաստանը ներքաշվում է «հարևան երկրում (ՀՀ-AT) քաղաքական պայքարի նման կոպիտ ձևերի» մեջ։
Մայիսի վերջից և հունիսի սկզբից «Ռոսսելխոզնադզորն» արգելել էր Հայաստանից ծաղիկների, մրգերի, բանջարեղենի և չրերի ներմուծումն ու տարանցումը ՌԴ:
Այս ֆոնին Հայաստանի իշխանությունները հունիսի սկզբին հայտարարել էին այլ երկրներ արտահանման հնարավորության և ՌԴ սահմաններից վերադարձվող ապրանքների սուբսիդավորման մասին։ Միաժամանակ, Երևանից ընդգծել էին, որ նպատակ չունեն ռուսական շուկայից արտահանումն ուղղել դեպի Եվրոպա։
Հունիսին Հայաստանից Լատվիա արտահանվել էր 5500, Լիտվա՝ 11 000, իսկ Ուկրաինա՝ 9500 ծաղիկ։ «Ռոսսելխոզնադզորում» նշել էին, որ 2025-ին ՌԴ-ում ծաղիկների ներմուծման ծավալը կազմել էր 96,2 մլն (հատ)։ ՀՀ վիճակագրական կոմիտեի տվյալներով՝ մինչ այժմ հայկական խմիչքների, սննդամթերքի և ծաղիկների արտահանման 84%-ից մինչև 98%-ն ուղղվել էր ռուսական շուկա։
Financial Times պարբերականը հայտնել էր, որ ՌԴ սահմանափակումների ֆոնին Եվրահանձնաժողովը Հայաստանի հետ առևտրային հարաբերությունները բարելավելու նպատակով հրատապ կարգով միջոցառումների փաթեթ է պատրաստում։
Կարդացեք նաև
Ծաղիկները սպասում են ընտրություններին
