Ռուսական կողմը հայտարարել է, որ ԱՄՆ հետախուզության հրապարակված նյութերը, ըստ իրենց մեկնաբանության, վկայում են Ուկրաինայում կենսալաբորատորիաների ֆինանսավորման մասին ԱՄՆ պետական բյուջեից, գրում է ՏԱՍՍ-ը։
Այս մասին հայտնել է ՌԴ ԶՈւ Ռադիացիոն, քիմիական և կենսաբանական պաշտպանության զորքերի ղեկավար, գեներալ-լեյտենանտ Ալեքսեյ Ռտիշչևը։
Նրա խոսքով՝ ԱՄՆ ազգային հետախուզության գրասենյակը հունիսի 12-ին հրապարակել էր գաղտնազերծված փաստաթղթեր, որոնք ռուսական կողմի գնահատմամբ՝ հաստատում են, որ Վաշինգտոնը թաքցրել է տեղեկություններ Ուկրաինայում և այլ երկրներում գործող կենսաբանական լաբորատորիաների վերաբերյալ։
Ռտիշչևը նշել է, որ այդ նյութերը, իրենց մեկնաբանությամբ, վկայում են, որ Ուկրաինայի տարածքում նման օբյեկտները ֆինանսավորվել և վերանորոգվել են ԱՄՆ դաշնային բյուջեի միջոցներով։
Ռուսական կողմն այս հայտարարությունները ներկայացրել է Մոսկվայում կայացած չեպազրույցի ընթացքում՝ պնդելով, որ ԱՄՆ-ն իբր դիտավորյալ չի բացահայտել համապատասխան տեղեկությունները։
Նախօրեին Մոսկվայի 4 օդանավակայան դադարեցրել էր աշխատանքը ռուս-ուկրաինական պատերազմի ֆոնին Մոսկվայի տարածաշրջանի վրա ԱԹՍ-ների հարձակումների սպառնալիքով պայմանավորված։
Ռուսաստանի և Ուկրաինայի միջև պատերազմը շարունակվում է արդեն ավելի քան չորս տարի՝ 2022 թվականի փետրվարից։ Այդ ընթացքում ԱԹՍ-ների հարձակումների սպառնալիքի պատճառով Ռուսաստանում բազմիցս սահմանափակվել է օդանավակայանների աշխատանքը։
