Վարչապետ Նիկոլ Փաշինյանը ճեպազրույցի ժամանակ մանրամասներ է ներկայացրել ԱՄՆ-ի հետ խաղաղ միջուկային էներգիայի ոլորտում համագործակցության համաձայնագրի մասին և բացատրել Երևանի հետաքրքրությունը մոդուլային ռեակտորի տեխնոլոգիաների նկատմամբ։
Մեկնաբանելով մոդուլային ռեակտորի նախագծի անվտանգության վերաբերյալ քննադատությունը՝ վարչապետը հայտարարել է, որ երկրի իշխանությունները ներդրումներ չէին կատարի որևէ վտանգավոր նախագծում։
«Եթե մոդուլյար ռեակտորում ի հայտ է գալիս վթարային իրավիճակ, դա համարվում է լոկալ իրադարձություն։ Դա նշանակում է, որ եթե վթար է տեղի ունեցել և մեկ կիլոմետր հեռավորության վրա կա բնակավայր, այդ բնակավայրն էվակուացնելու անհրաժեշտություն չկա, այսինքն՝ սա տեխնիկական պարամետրերն են։ Ստորագրումից, վավերացումից հետո ավելի մանրամասն հասանելիություն կունենանք այս տեղեկատվությանը, հասանելիություն կունենանք, թե որտեղ ինչ է կառուցվում, լիցենզավորված է, լիցենզավորված չէ, որից հետո կկայացնենք որոշումներ»,- ասել է նա։
Փաշինյանը նշել է, որ ըստ ԱՄՆ-ի հետ ստորագրված համաձայնագրի՝ Հայաստանը կստանա Միացյալ Նահանգների համար հասանելի մոդուլային ռեակտորի տեխնոլոգիայի մասին լիարժեք տեղեկատվություն։ Նա ընդգծել է, որ այդ տեխնոլոգիաները գաղտնի են այն երկրների համար, որոնք նմանատիպ համաձայնագրեր չեն կնքել ԱՄՆ-ի հետ։ Փաշինյանը մանրամասնել է, որ Հայաստանը Վաշինգտոնի հետ համաձայնագիրն ստորագրել է տեխնոլոգիաներին հասանելիություն ստանալու և լիարժեք գնահատման համար։
Վարչապետը նշել է նաև, որ նոր ատոմակայանը քննարկվել է նաև ռուս գործընկերների հետ։ Նրա խոսքով՝ ռուսական տեխնոլոգիայի առանձնահատկությունն այն է, որ ջրի վրա է և Չուկոտկայում տեղակայված «սուզանավային ռեակտորի ադապտացված տարբերակ» է:
«Ռուսաստանի մեր գործընկերներին խնդրել ենք, որպեսզի նրանք մեր փորձագիտական պատվիրակության այց կազմակերպեն, որպեսզի հնարավորություն ունենանք հասանելիություն ունենալ այդ տեխնոլոգիային»,- ասել է նա՝ հավելելով, որ Ռուսաստանը ցամաքում տեղակայված նման ռեակտոր չունի:
Փաշինյանը հավելել է, որ նմանատիպ տեխնոլոգիաներ գոյություն ունեն Չինաստանում և Հարավային Կորեայում: Նա ընդգծել է, որ հայկական կողմն այս հարցը քննարկում է համապատասխան տեխնոլոգիաների տիրապետող բոլոր գործընկերների հետ: Նա նշել է, որ ԱՄՆ-ի հետ համաձայնագիրն ստորագրելուց հետո հայկական կողմը հասանելիություն կունենա տեխնոլոգիայի մասին տեղեկատվությանը, որից հետո որոշում կկայացնի:
Փետրվարի 9-ին Հայաստանը և ԱՄՆ-ն ստորագրել էին համատեղ հայտարարություն՝ ամփոփելով ատոմային էներգիայի խաղաղ օգտագործման վերաբերյալ համագործակցության համաձայնագրի շուրջ բանակցությունները։
Մանրամասները՝ տեսանյութում։
