Հակակոռուպցիոն դատարանը 2 ամսով երկարաձգել է «Տաշիր» ընկերությունների խմբի նախագահ Սամվել Կարապետյանի կալանքը, տեղեկացրել է փաստաբան Արամ Վարդևանյանը: Armenia Today-ի ուղիղ հեռարձակումը՝ դատարանի բակից։
Հունիսին Կարապետյանին կալանավորել էին եկեղեցու դեմ արշավը քննադատելուց հետո։ Դատարանը «մեր ձևով» եկեղեցուն սատարելու խոսքի համար գորածարարին մեղադրանք էր առաջադրել իշխանությունը բռնությամբ զավթելու հրապարակային կոչի հատկանիշով։ Ավելի ուշ գործարարին տնտեսական բնույթի մեղադրանքներ էին առաջադրվել՝ փողերի լվացման, հարկեր և տուրքեր չվճարելու կազմակերպման հատկանիշներով։
Գործարարը չի ընդունում իրեն առաջադրված մեղադրանքները, նրա պաշտպանական խումբը հունիսից հայտարարում է, որ Կարապետյանի կալանքը քաղաքական հետապնդում է։ Կարապետյանի փաստաբան Լիանա Գալստյանը նոյեմբերի 18-ի դատական նիստից հետո լրագրողներին տեղեկացրել է, որ նույն նիստում գործարարը վերահաստատել է դիրքորոշումը՝ չի ընդունում իրեն առաջադրված մեղադրանքները։
Գալստյանը շեշտել է, որ եթե Վճռաբեկ դատարանի որոշմամբ «փողերի լվացման հիմնավոր կասկածը» չհիմնավորվեր, ապա Կարապետյանի կալանքը դատարանը չէր կարող երկարաձգել։ Իրավաբանների խոսքով՝ միայն այդ որոշման հիմքով են կարողացել Կարապետյանի կալանքը երկարացնելու միջնորդություն ներկայացնել, քանի որ մինչ այդ տնտեսական մեղադրանքները փաստացի մերժվել էին Վերաքննիչ ատյանի կողմից:
Վարդևանյանը դատարանի որոշումը որակել է որպես «իրավական ծաղր», ինչպես նաև «իրավական ահաբեկչություն»՝ այն կապելով Հանրային ծառայությունները կարգավորող հանձնաժողովի կողմից Կարապետյանին պատկանող «Հայաստանի էլեկտրական ցանցեր» ընկերության լիցենզիան դադարեցնելու որոշման հետ։ ՀԾԿՀ-ից հայտարարել էին, որ առաջիկա 3 ամիսներին ՀԷՑ-ի սեփականատիրոջ կամ ընկերության տնօրենների խորհրդի հետ բանակցելու են ընկերության գույքի սեփականության իրավունքի փոխանցման վերաբերյալ։
«Ասվում է, որ երեք ամիս ժամանակ կա սեփականատիրոջ հետ բանակցելու համար։ Գնալու են քրեակատարողական հիմնարկում բանակցե՞ն։ Սա որոշակի իմաստով ահաբեկչական գործողության է նման։ Ահաբեկիչներն են, ի վերջո, պատանդ պահում մարդուն, սա ի՞նչ վարքագիծ է։ Այստեղ իրավական պրոցես չկա, սա իրավական ահաբեկչություն է»,- շեշտել է Վարդևանյանը։
Նա նաև նշել է, որ իշխանությունների հետ կապված «Հայկական ժամանակ» օրաթերթը նախապես կանխորոշել էր Հակակոռուպցիոն դատարանի որոշումը՝ Կարապետյանի կալանքը երկարաձգելու մասին:
«Ինչո՞ւ է ամբողջ դատական գործընթացը, եթե «Հայկական ժամանակ» օրաթերթը կարող է դատական որոշման ամբողջ ելքը կանխորոշել՝ դեռ երեկվա դրությամբ ժամը 18:30-ին։ Թերի նյութը հենց 2-ամսյա կալանքի մասին էր, ու այն երեկվա դրությամբ՝ 23։00-ին, նույն կերպով պահպանված էր։ Դատական նիստի ժամանակ ես ու գործընկերներս բարձրաձայնել ենք այդ նյութի մասին, դատավորն էլ վրդովմունք հայտնեց, թե, իբր, իրեն ո՞ւմ տեղն ենք դրել, ինքն ինչպե՞ս կարող է լրատվամիջոցի կանխատեսմամբ առաջնորդվել, մինչդեռ 100%-ով այդ կանխատեսումը կատարեց»,- ընդգծել է Վարդևանյանը։
Կարապետյանի առաջնորդությամբ ստեղծված «Մեր ձևով» ժողովրդական շարժման անդամ Ալիկ Ալեքսանյանը «սրիկայություն» է անվանել գործարարի կալանքի երկարաձգումը։
«Ներողություն եմ խնդրում, բայց սա ավելի քան սրիկայություն է, նողկալի գործողություն։ Սա հեշտ չեն մարսելու, պայքարելու ու հաղթելու ենք մեր ձևով։ Հայաստանն ունենալու է այնպիսի իրավական ու տնտեսական համակարգ, որի մասին բոլորն են երազելու»,- հավելել է նա։
Ավելի ուշ շարժումը պաշտոնապես հայտարարել է, որ Հակակոռուպցիոն դատարանի որոշումն արդարադատության բացակայության և հակաժողովրդավարական կարգերի հաստատման ապացույց է։
«Մեկ մարդ է որոշում` ով և ինչքան պետք է կալանավորված լինի, իսկ վճիռները հրապարակում է ոչ թե դատարանը, այլ իշխող ընտանիքին պատկանող թերթը՝ դատական նիստի ավարտից մեկ օր առաջ։ Հայկական պետականությունը խորը ճգնաժամ է ապրում, որը պետք է հաղթահարենք միասին։ Հայաստանը չպետք է լինի մեկ մարդու գրպանային պետություն։ Որքան էլ անելանելի թվա իրավիճակը ու որքան էլ բիրտ լինի գործող իշխանության ճնշումը, ոչ մի վայրկյան չե´նք դադարեցնելու պայքարը»,- ասված է շարժման հայտարարության մեջ։
Դատարանն օգոստոսի 15-ին երկու ամսով երկարացրել էր բարերարի կալանքը։ Ավելի ուշ Վերաքննիչ դատարանը մերժել էր փաստաբանների բողոքը խափանման միջոցը փոխելու վերաբերյալ՝ գործարարի կալանքն ուժի մեջ թողնելով մինչև հոկտեմբեր: Դատարանը հոկտեմբերի 16-ին 30 օրով երկարաձգել էր նրա կալանքի ժամկետը, ավելի ուշ Վերաքննիչ դատարանն անփոփոխ էր թողել Հակակոռուպցիոն դատարանի որոշումը։ Նոյեմբերի 13-ին ՔԿ-ն Կարապետյանի կալանքը 2 ամսով երկարաձգելու միջնորդություն էր ներկայացրել:
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
«Իրավական ամենաթողություն է»․ Սամվել Կարապետյանի փաստաբանները կբողոքարկեն կալանքը երկարաձգելու որոշումը
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
