«Քաղաքացիական պայմանագրի» պատգամավոր, ՀՀ ԱԺ տնտեսական հարցերի մշտական հանձնաժողովի նախագահ Բաբկեն Թունյանը հայտնել է, որ ֆիզիկական անձանց եկամուտների հայտարարագրման համակարգում փոփոխություններ են պատրաստում, որոնք նպատակ ունեն պարզեցնել այդ գործընթացը։
Նրա խոսքով, եթե քաղաքացին գտնում է, որ ՊԵԿ-ի կողմից տեսանելի եկամուտներից բացի ինքը որևէ այլ եկամուտ չունի, կարող է մուտք չգործել համակարգ, և վերջնաժամկետից՝ նոյեմբերի 1-ից հետո կհամարվի, որ քաղաքացու հայտարարագիրը լրացված և հանձնված է։
Թունյանը հավելել է, որ սա չի վերաբերում այն դեպքերին, երբ մարդը հստակ գիտի, որ ինքն ունի այլ եկամուտներ, որոնք ՊԵԿ-ին հասանելի չեն։
«Եթե հետագայում պարզվի, որ կային նման եկամուտներ, և քաղաքացին չի լրացրել դրանք, ապա դրա համար պատասխանատվություն կա»,- ասել է նա։
Պատգամավորը նաև հայտնել է, որ քաղաքացու համաձայնության դեպքում ՊԵԿ-ը կարող է նրա ավանդներից ստացված եկամուտների մասին տեղեկատվությունը բանկից ստանալ և ինքնաշխատ լրացնել դրանք։
Հայաստանում 2023 թվականին ներդրվել էր եկամուտների համընդհանուր հայտարարագրման համակարգ։ 2024 թվականի համար հայտարարվել էր, որ ֆիզիկական անձինք եկամուտների հայտարարագիր պետք է ներկայացնեն էլեկտրոնային եղանակով։ ՀՀ վարչապետ Նիկոլ Փաշինյանը հունվարին հայտարարել էր, որ Հայաստանի իշխանությունները երկարաձգում են եկամտահարկի հայտարարագրի ներկայացման ժամկետը մայիսից մինչև նոյեմբերի 1-ը։
