Դիանա Գասպարյանի սկեսրոջը մեղադրա՞նք է առաջադրվել

Հակակոռուպցիոն կոմիտեից Armenia Today-ին չեն մեկնաբանել Էջմիածնի նախկին քաղաքապետ Դիանա Գասպարյանի սկեսրոջը փողերի լվացման հատկանիշներով մեղադրանք առաջադրելու մասին տեղեկությունը։

Հուլիսի 22-ին ArmLur.am-ը գրել է, որ Գասպարյանի սկեսրոջը մեղադրանք են առաջադրել փողերի լվացման հատկանիշներով։

Կայքը հուլիսի 15-ին հայտնել էր Գասպարյանին պաշտոնատար անձի կողմից իշխանական կամ ծառայողական լիազորությունները չարաշահելու, ինչպես նաև հայտարարագրում կեղծ տվյալներ ներկայացնելու հատկանիշներով մեղադրանք առաջադրելու մասին։ Լրատվամիջոցի տեղեկություններով՝ Գասպարյանի նկատմամբ խափանման միջոց է ընտրվել երկրից բացակայելու արգելքը:

ԶԼՄ-ն հուլիսի 15-ին հավելել էր, որ «առաջիկայում Գասպարյանի ընտանիքի շուրջ աղմկահարույց գործընթացներ են սկսվելու»։

Գասպարյանը մայիսի 15-ին հրաժարական էր տվել պաշտոնից, ինչին նախորդել էր նրա սկեսրայրին պատկանող գազալցակայանում մարտի 22-ին տեղի ունեցած սպանությունը։ Մամուլի տեղեկություններով՝ իրավապահները կասկածներ ունեն, որ սպանությանը մասնակից է Գասպարյանի ամուսինը՝ «Քաղաքացիական պայմանագրի» անդամ Արամայիս Միրզոյանը։ Քննչական կոմիտեն հուլիսի 14-ին հայտնել էր, որ գազալցակայանում տեղի ունեցած սպանության դեպքից հետո գազալցակայանի 2 աշխատակից թաքցրել է հանցագործություններ՝ սպանություն կատարած անձի բացահայտմանը խոչընդոտելու նպատակով։

Կոռուպցիայի կանխարգելման հանձնաժողովը 2024-ի հուլիսի 15-ին Գասպարյանին ենթարկել էր վարչական պատասխանատվության 300 000 դրամի չափով՝ շահերի բախմանն առնչվող գործողություններ կատարելու համար։