ԱՄՆ դրոշի ներքո հանդես եկող հայ շախմատիստ Լևոն Արոնյանը դարձել է Freestyle Chess Grand Slam Tour Ֆիշերի արագ շախմատի մրցաշարի հաղթող: Այս մասին Արոնյանը գրել է Ֆեյսբուքում:
«Շատ ուրախ եմ հաղթելու համար։ Շնորհակալ եմ ընտանիքիս, ընկերներիս և երկրպագուներիս։ Միշտ առաջ»,- նշել է նա։
Լաս Վեգասում կայացած մրցաշարի եզրափակչի երկու պարտիաներում Արոնյանը 1,5:0,5 հաշվով հաղթել է ամերիկացի Հանս Նիմանին:
Երբ Նիմանը մեկնել է ձեռքը՝ ճանաչելով պարտությունը, դահլիճը հուժկու ծափահարություններով է արձագանքել։ Գրոսմայստեր Դեյվիդ Հաուելը հարցրել է Արոնյանին, թե ինչպե՞ս է գնահատում այս հաղթանակը՝ համեմատելով իր կարիերայի մյուս ձեռքբերումների հետ, ինչին հայազգի շախմատիստը պատասխանել է, որ սա «հստակորեն մարգարիտներից մեկն է»։
Արոնյանը հուլիսի 21-ին մեկնել է Սաուդյան Արաբիա, որտեղ անցկացվելու է Esports World Cup 2025 կիբերսպորտի առաջնությունը՝ 1,5 միլիոն դոլար մրցանակային ֆոնդով։
«Կարծում եմ՝ եթե լավ ես խաղում, էներգիա միշտ կունենաս»,- այսպես է նա գնահատել իր հնարավորությունները։
Freestyle Chess Grand Slam Tour մրցաշարն անցկացվել է հուլիսի 15-19-ը։ Մրցաշարին մասնակցել է 16 շախմատիստ։ Արոնյանը նվաճել է գլխավոր մրցանակը՝ 200 000 դոլար։ Նորվեգացի Մագնուս Կառլսենը, երրորդ տեղի համար պայքարում հաղթելով ԱՄՆ-ն ներկայացնող Հիկարու Նակամուրային, վաստակել է 100 000 դոլար։
Արոնյանն ավելի վաղ հաղթանակներ էր տարել Կառլսենի, Նակամուրայի, հնդիկ Արջուն Էրիգաիսիի նկատմամբ:
