«Մեր քաղաքը» դաշինքի թեկնածու Մարտուն Գրիգորյանն Գյումրու քաղաքապետի ընտրություններից 6 օր անց հայտարարել է, որ պատրաստ է Կոմունիստական կուսակցության թեկնածու Վարդան Ղուկասյանին անհրաժեշտ քվե տալ։ Նա այդ մասին գրել է ֆեյսբուքյան իր էջում։
Նա նշել է, որ կտա անհրաժեշտ քանակությամբ քվե՝ ընտրություններում ավագանի անցած մյուս ընդդիմադիր երկու ուժերի կողմից սատարվող թեկնածուին՝ «առանց որևէ պաշտոնի, ակնկալիքի և որևէ պայմանավորվածության»։
Գրիգորյանը շեշտել է, որ որոշումը կայացրել է ինքնուրույն և որևէ քաղաքական ուժ չի ազդել դրա վրա։ Նա պարզաբանել է, թե ինչու անմիջապես նման հայտարարությամբ հանդես չի եկել, ինչպես դա արել են «Մայր Հայաստան» դաշինքի և «Իմ հզոր համայնք» կուսակցության թեկնածուներ Կարեն Սիմոնյանը և Ռուբեն Մխիթարյանը։ Գրիգորյանը հիշեցրել է, որ ընտրություններից առաջ զգուշացրել էր Գյումրիի քաղաքապետի պաշտոնում Ղուկասյանի ընտրվելու ռիսկերի մասին։
«Քարոզարշավի ընթացքում բացահայտ ասել եմ և միակն եմ եղել, որ խոսել եմ՝ ինչ է լինելու ընտրություններից հետո, եթե քաղաքապետ ընտրվի Ղուկասյանը։ Մնում եմ նույն համոզմունքին, որ նա ամենախոցելի թեկնածուն է` քրեական գործերով պայմանավորված։ Թե ի՞նչ կլինի հետո ու ինչպես կվարվեն տվյալ մարդու հետ՝ լավ հիշեք այս օրը։ Գյումրին կտանե՞ն Վանաձորի ճանապարհով, թե՞ ոչ՝ տա Աստված, որ սխաված լինեմ»,- հայտնել է նա։
Գրիգորյանն ափսոսանք է հայտնել, որ մյուս թեկնածուներն իր մտահոգությունները հաշվի չեն առել:
«Այս վտանգների մասին այս ընթացքում ուղիղ կամ միջնորդավորված խոսել եմ, հատուկ զգուշացրել եմ մյուս թեկնածուներին, մասնավորաբար, Մխիթարյանին ու Սիմոնյանին»,- ասված է նրա հայտարարության մեջ։
Նա հավելել է, որ քաղաքի ճակատագիրն այսուհետ իրենց վրա են վերցնում երեք ուժերը՝ Ղուկասյանի գլխավորությամբ, այնուամենայնիվ, ինքը կշարունակի «ամեն ինչ անել, որ ՔՊ-ն Գյումրիում քաղաքապետ չունենա»։
«Իմ հզոր համայնք» կուսակցության և «Մայր Հայաստան» դաշինքի ներկայացուցիչները մարտի 31-ին հայտարարել էին իրենց ձայները Ղուկասյանին տալու որոշման մասին, ինչի արդյունքում իշխող «Քաղաքացիական պայմանագիրը» կզրկվի առաջատարի դիրքերից։ Մարտի 30-ին տեղի ունեցած ՏԻՄ ընտրությունների տվյալներով՝ թեպետ Գյումրիում ՔՊ-ն առաջատար է, սակայն 50+ ձայներ չի հավաքել։
Գյումրիում 82 ընտրական տեղամասի արդյունքներով՝ ՔՊ-ն և ՔՊ-ի քաղաքապետի թեկնածու Սարիկ Մինասյանը հավաքել էին 17 183 ձայն։ Երկրորդ տեղում Ղուկասյանն էր՝ 9727 ձայնով։ Երրորդ տեղում Գրիգորյանը՝ 7380 ձայնով, չորրորդում՝ Մխիթարյանը՝ 3734 ձայնով։ Առաջատարների հնգյակը 2902 ձայնով եզրափակում էր Սիմոնյանը։
Փարաքարում ձայների հաշվարկի արդյունքներով՝ առաջատար էին «Միասնություն» կուսակցությունների դաշինքը և նրա քաղաքապետի թեկնածու Վոլոդյա Գրիգորյանը՝ հավաքելով 6508 ձայն։ Երկրորդ տեղում ՔՊ թեկնածու Լյուդվիգ Գյուլնազարյանն էր՝ 3669 ձայնով։ «Ազգային առաջընթաց» և «Կայունություն» կուսակցություններն ստացել էին համապատասխանաբար 900 և 426 ձայն։
