Վարչապետ Նիկոլ Փաշինյանը ՀՀ երեք նախկին նախագահներից պահանջել է կա՛մ իր հետ ուղիղ եթերում բանավիճել Արցախյան հակամարտության հարցի շուրջ, կա՛մ վերջ տալ այս թեմայով հայտարարություններին։
Խորհրդարանում մեկնաբանելով տարածքների հանձնման վերաբերյալ ընդդիմության մեղադրանքները՝ Փաշինյանը հայտարարել է, որ Հայաստանի միջազգայնորեն ճանաչված տարածքի տեսանկյունից «որևէ բան չի զիջվել»։
Նա կրկնել է այն միտքը, որ երբ 2018 թվականի գարնանը եկավ իշխանության, բանակցությունների սեղանին դրված էր կարգավորման տարբերակ, որը ներառում էր հայկական կողմից զիջումներ։ Ըստ Փաշինյանի՝ նախկին նախագահ Սերժ Սարգսյանը բանակցային ժառանգություն է թողել, որից դուրս գալու համար պետք է զիջումներ լինեին։ Նրա խոսքով՝ Սարգսյանի թողած բանակցային բովանդակության պայմաններում «չկար որևէ մի հնարավոր գործողություն, որը հնարավոր լիներ ձևակերպել այլ կերպ, քան կապիտուլյացիա»։
«Եթե կար, թող այդ գործողությունն աներ, ոչ թե գար, այս ամբիոնից պատերազմի անոնս աներ»,- ասել է վարչապետը՝ նախկին նախագահին անվանելով «թիվ մեկ կապիտուլյանտ»։
Վարչապետի խոսքով՝ 2020 թվականի նոյեմբերից առաջ և հետո նախկին նախագահների խնդիրն էր «իր վզին փաթաթել իրենց կառուցած կապիտուլյացիան»։
«Բա դրա համար եմ այդ մարդկանց ասում, եկեք գնանք ուղիղ եթերում խոսենք, 3 մտքի տիտաններն ասում են՝ «ես այսօր գործ ունեմ», «ես այսօր բան»։ Բոլորն ասում են՝ «մենք իր հետ բանավիճելու բան չունենք»։ Հետո իրենց երեխեքին, թոռներին, ծոռներին, խնամիներին, հարսներին, բաջանաղներին ուղարկում են ասուլիսներ տալու»,- ասել է Փաշինյանը։
Նա կոչ է արել չբանավիճելու դեպքում լռել։ «Եթե բան չկա բանավիճելու, վեր ընկեք տեղներդ, ձեններդ կտրեք։ Եթե բանավիճում եք, եկեք խոսենք։ Ես ձեզ հետ չեմ բանավիճի, ես ձեզ պատերով կտամ և այդտեղից ձեր քաղաքական դիակի մնացորդները դուրս կհանեն, երեքիդ էլ վերաբերվում է։ Հերիք է ներվերներիս հետ խաղաք։ Ես ձեզ ոտի տակ կտամ, ոչ թե ձեզ հետ կբանավիճեմ»,- հավելել է Փաշինյանը։
Մանրամասները՝ տեսանյութում։
