Դատարանը Ասկերանի քաղաքապետ Հայկ Շամիրյանի նկատմամբ որպես խափանման միջոց է կիրառել վարչական հսկողությունը, հայտնել է փաստաբան Վահե Եփրիկյանը։
«Դատարանը Ասկերանի քաղաքապետ Հայկ Շամիրյանի նկատմամբ ընտրված տնային կալանքը երկարացնելու մասին քննիչի միջնորդությունը քննության առնելով` որոշեց այն մասնակի բավարարել` որպես խափանման միջոց կիրառելով վարչական հսկողությունը»,- Facebook-ի իր էջում գրել է փաստաբանը։
Շամիրյանը մեղադրվում է ՀՀ քրեական օրենսգրքի 46-236-րդ հոդվածի 2-րդ մասով (հավաքին մասնակցելուն հարկադրելը, պատժվում է ազատազրկմամբ՝ առավելագույնը 3 տարի ժամկետով), 255-րդ հոդվածի 3-րդ մասի 3-րդ կետով (առանձնակի խոշոր չափերով խարդախություն, պատժվում է ազատազրկմամբ՝ առավելագույնը 8 տարի ժամկետով) և 457-րդ հոդվածի 1-ին (փաստաթղթեր կեղծելը, պատժվում է ազատազրկմամբ՝ առավելագույնը 2 տարի ժամկետով) մասով։
Մայիսի 23-ին իրավապաշտպան Ռուբեն Մելիքյանը հայտնել էր, որ Շամիրյանի տանն իրականացրած խուզարկությունից հետո իրավապահները ձերբակալել են նրան։ Իրավապաշտպանը նշել էր, որ Շամիրյանին ձերբակալել են Ասկերան համայնքի գույքի իրավունքի վերաբերյալ նախաձեռնված քրեական վարույթի շրջանակում։ Մելիքյանը, սակայն, հայտարարել էր, որ Շամիրյանը հետապնդման է ենթարկվում սահմանազատման գործընթացի դեմ ձևավորված «Տավուշը հանուն հայրենիքի» շարժումը գլխավորող, Հայ առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանի հետ հանդիպելու համար։
Մայիսի 24-ին Շամիրյանի նկատմամբ դատարանը որպես խափանման միջոց կիրառել էր տնային կալանքը։
Հուլիսի 19-ին դատարանը վարչական հսկողություն էր սահմանել նաև Ստեփանակերտի քաղաքապետ Դավիթ Սարգսյանի նկատմամբ՝ սահմանափակելով նրա տեղաշարժման և գործողությունների ազատությունը։
