Առաջիկայում Բրյուսելում սպասվելիք Փաշինյան-Ալիև հերթական հանդիպումից Կովկասի ինստիտուտի ավագ գիտաշխատող, քաղաքագետ Հրանտ Միքայելյանը դրական ակնկալիքներ չունի:
Վերլուծելով բանակցային գործընթացը՝ Armenia Today-ի հետ զրույցում նա ընդգծել է, որ ակտիվացումն ակնհայտ է, թեպետ խոսքն այս դեպքում վերաակտիվացման մասին է:
«Իրականում և մեծ հաշվով այդ ակտիվացումն սկսվել է մասնավորապես Պրահայից հետո, պարզապես հիմա զարգամանը, շարունակությանն ենք ականատես լինում»,-ասաց մեր զրուցակիցը:
Անդրադառնալով Մյունխենից հետո Բրյուսելից ունեցած սպասելիքներին՝ նա նշեց. «Հաշվի առնելով, որ Հայաստանի դիրքորոշումն այս պահի դրությամբ շատ թույլ է, դրական ակնկալիքներ ես բացարձակապես չունեմ: Պարզ է, որ ռեսուրսային առումով Հայաստանն Ադրբեջանին զիջում է, բայց այստեղ շատ կարևոր է նաև քաղաքական կամքը, նպատակահարմարությունը և թե ինչ քաղաքականություն է որդեգրված. Հայաստանը հայտարարել է, որ Արցախի հարցն Ադրբեջանի ներքին հարցն է: Մենք այս քաղաքականությունից որևէ լավ ակնկալիք ունենալ չենք կարող»:
Խոսելով խաղաղության պայմանագրի շուրջ բանակցություններից, հաշվի առնելով, որ հայտարարվել է որոշ կետերի շուրջ համաձայնության գալու մասին, քաղաքագետի խոսքով, Ադրբեջանի օրակարգն իրականում շատ հստակ է, իսկ Հայաստանի օրակարգն անհասկանալի է:
«Ես մի քիչ դժվարանում եմ ասել, թե ինչի շուրջ համաձայնություն կա: Բայց հիշենք Ադրբեջանի առաջ բերած հինգ ու Հայաստանի իշխանությունների 6 կետերը: Մասնավորապես, որ Հայաստանն, ըստ էության, ընդունել է Ադրբեջանի կետերը, բայց Ադրբեջանը Հայաստանի ներկայացրած կետերը չի ընդունել: Այսպիսով՝ բանակցությունները տեղի են ունենում ադրբեջանական պլատֆորմի վրա: Իսկ ինչ վերաբերվում է արդեն ներկա պրոգրեսին, ապա այն մի քիչ անհասկանալի է»,-ասաց Հ. Միքայելյանը՝ հիշեցնելով, որ ՀՀ բարձրաստիան մի շարք պաշտոնյաներ դեռ ամիսներ առաջ են հայտարարել, որ Ադրբեջանի հինգ կետերը հիմնականում ընդունելի են իրենց համար:
Քաղաքագետը կարծում է, որ այս պահի դրությամբ պայմաններն այնքան չեն հասունացել, որ Բրյուսելում պայմանագիր ստորագրվի:
«Բայց այս պահի դրությամբ մենք ավելի մոտ ենք այդ համաձայնությանը, քան առաջ: Քիչ-քիչ պրոգրես կա: Այստեղ գլխավոր խոչընդոտն Ադրբեջանն է: Ադրբեջանի դիրքորոշումը շատ կտրուկ է: Ադրբեջանին չի բավարարում ՀՀ իշխանությունների զիջումների չափը: Ադրբեջանի ախորժակն անընդհատ մեծանում է»,-եզրափակեց մեր զրուցակիցը:
Հիշեցնենք, որ ավելի վաղ ԱՄՆ Պետդեպարտամենտում հայտնել են Բրյուսելում Հայաստանի և Ադրբեջանի ղեկավարների հնարավոր հանդիպման մասին:
Աննա Բադալյան
