ՀՀ տարածքային կառավարման և ենթակառուցվածքների նախարարությունը պատրաստել է «Հայաստանի էլեկրտրական ցանցերի» (ՀԷՑ) 100% բաժնետոմսերը հանրության գերակա շահ ճանաչելու մասին նախագիծ, հայտնել է ՀԷՑ-ի ժամանակավոր կառավարիչ Ռոմանոս Պետրոսյանը
Նրա խոսքով՝ նախագիծն արդեն հրապարակել է և ՀՀ կառավարությունը ՀԷՑ-ի 100% բաժնետոմսերը հանրության գերակա շահ կճանաչի։
Ըստ Պետրոսյանի՝ նախագծի հիմնավորման հիմքում դրված են մի շարք փաստեր։ Նշվում է, որ էլեկտրաէներգիայի բաշխումը կենսական հանրային ծառայություն է և ՀՀ հանրային ծառայությունները կարգավորող հանձնաժողովի կողմից ՀԷՑ-ի լիցենզիայի գործողության դադարեցումից հետո անհրաժեշտ է ապահովել բնակչության անխափան էլեկտրամատակարարումը, սոցիալական և ռազմավարական օբյեկտների բնականոն գործունեությունը, էներգետիկ համակարգի կայունությունը, սպառողների իրավունքների պաշտպանությունը։
Նաև ասվում է, որ էլեկտրաէներգիայի բաշխիչ ցանցերը, իրենց բնույթով, հանդիսանում են ռազմավարական ենթակառուցվածք, որի գործունեության խափանումը կարող է առաջացնել լայնածավալ սոցիալական, տնտեսական և անվտանգային հետևանքներ։
Նախագծի քննարկման ժամկետ է սահմանված մինչև հուլիս 8-ը։
Ավելի վաղ ԶԼՄ-ները հայտնել էին, որ ընկերությունը հանրային գերակա շահ ճանաչելուց հետո իշխանությունները մտադիր են պատվիրել ընկերության շուկայական արժեքի անկախ գնահատում։ Գնահատողի որոշած գնին նախատեսվում է ավելացնել 15%, որից հետո վերջնական առաջարկը կներկայացվի ՀԷՑ-ի սեփականատեր, «Տաշիր» ընկերությունների խմբի նախագահ և «Ուժեղ Հայաստան» դաշինքի առաջնորդ Սամվել Կարապետյանին։
Իշխանությունները ՀԷՑ-ը վերահսկողության տակ վերցնելու գործընթաց էին նախաձեռնել Կարապետյանի կալանավորումից հետո։ Չնայած Ստոկհոլմի արբիտրաժային ինստիտուտը կառավարությանը պարտավորեցրել էր ձեռնպահ մնալ բռնագրավման քայլերից՝ ՀԾԿՀ-ն ավելի ուշ դադարեցրել էր ՀԷՑ-ի լիցենզիան։ Մայիսին ՀՀ վարչական դատարանը արգելել էր իշխանություններին գործողություններ ձեռնարկել ընկերության շուրջ՝ մասնավորապես օտարել այն։
«Տաշիր» ընկերությունների խումբը տեղի ունեցողը որակում է որպես քաղաքական գործընթաց և ահազանգում ներդրումային միջավայրի վտանգների մասին։
Կարդացեք նաև՝
ՀԷՑ-ի բաշխիչ ցանցի միացման վճարները նոր բաժանորդների համար նվազել են ընտրություններից առաջ
