Flightradar-ի տվյալներով՝ Գյումրիից Մոսկվա մեկնած ուղևորատար ինքնաթիռը թռիչքի ընթացքում տագնապի ազդանշան է փոխանցել, հայտնում է ՏԱՍՍ-ը՝ հղում անելով Flightradar ծառայությանը։
Boeing տեսակի օդանավը Գյումրիից օդ է բարձրացել Մոսկվայի ժամանակով ժամը 11:24-ին։ Թռիչքից մոտ մեկ ժամ անց, գտնվելով Դաղստանի օդային տարածքում, այն փոխանցել է արտակարգ իրավիճակի ազդանշան և իջել շուրջ 3000 մետր բարձրության։
Չվերթը նախատեսված էր Մոսկվա հասնել Մոսկվայի ժամանակով ժամը 15:25-ին։ Ավելի ուշ հայտնի է դարձել, որ օդանավը վայրէջք է կատարել Մախաչկալայում։
Ավելի ուշ Ռուսաստանի Քննչական կոմիտեն (ՔԿ) Գյումրի-Մոսկվա չվերթի հարկադիր վայրէջքի պատճառ է անվանել տվիչի սխալը։ Մախաչկալայի օդանավակայանում «Պոբեդա» ավիաընկերության ինքնաթիռի հարկադիր վայրէջքի պատճառը եղել է ապահերմետիկացման տվիչի սխալ գործարկումը, ասվում է ՌԴ ՔԿ տրանսպորտի հարցերով Արևմտյան միջտարածաշրջանային քննչական վարչության մամուլի ծառայության հաղորդագրության մեջ:
Ըստ նախնական տվյալների՝ Գյումրիից Մոսկվա ուղևորվող Boeing ինքնաթիռը թռիչքից հետո մեկ ժամից էլ քիչ ժամանակ անց տագնապի ազդանշան է տվել և հարկադիր վայրէջք կատարել Մախաչկալայում: Ոչ ոք չի տուժել:
«Պոբեդա» ավիաընկերությունից հայտնել են, որ Գյումրիից Մոսկվա ուղևորվող ինքնաթիռը արտապլանային վայրէջք է կատարել Մախաչկալայի օդանավակայանում, որտեղ իրականացվում է օդանավի տեխնիկական վիճակի գնահատում: Նշվել է, որ վայրէջքն անցել է բարեհաջող: Ավիաընկերությունից չեն հստակեցրել արտապլանային վայրէջքի պատճառները: Օդանավում եղել է 186 մարդ: Ուղևորներին Մոսկվա կուղարկեն այլ ինքնաթիռով:
Նյութը թարմացվել է 22.06 | 15։50
