Վրաստանի վարչապետ Իրակլի Կոբախիձեն հայտարարել է, որ Բրյուսելի՝ Հայաստանի և Վրաստանի միջև «սեպ խրելու» փորձերը կձախողվեն։ Նա «Իմեդի» հեռուստաընկերությանը տված հարցազրույցում այսպես է պատասխանել հարցին, թե ի՞նչ տպավորություն է թողնում Բրյուսելի որոշակի ուժերի վերաբերմունքը Հայաստանի և Վրաստանի նկատմամբ։
Վրաստանի վարչապետը նշել է, որ տեսնում են «տեղական գործակալների և նրանց արտասահմանյան հովանավորների» փորձերը՝ Վրաստանին Հայաստանի դեմ տրամադրելու ուղղությամբ, այդ թվում՝ այս համեմատությունների միջոցով։
«Առավելագույնս աջակցում ենք մեր բարեկամ երկիր Հայաստանին և հայ ժողովրդին։ Սա միակ բանն է, որ կարելի է ասել Հայաստանի վերաբերյալ»,- շեշտել է նա։
Անդրադառնալով եվրոպացի պաշտոնյաներից մեկի այն հայտարարությանը, թե Հայաստանը Կենտրոնական Ասիան Եվրոպային կապող «ամենակարճ ճանապարհն է», Վրաստանի վարչապետը կասկած է հայտնել։
«Թվում է, թե տնտեսական լճացման և այլ «բարիքների» հետ մեկտեղ եվրոպացի բյուրոկրատներն առանձնապես ուժեղ չեն նաև աշխարհագրության դասերում»,- մեկնաբանել է նա։
Մայիսի 4-ին Եվրահանձնաժողովի նախագահ Ուրսուլա Ֆոն Դեր Լայենը ՀՀ-ում հայտարարել էր, որ Հայաստանը կապահովի Կասպից ծով և Կենտրոնական Ասիա տանող ամենակարճ ճանապարհը։ Նա նշել էր, որ այդ երթուղին նախկինում փակ էր, բայց հիմա, «ՀՀ-ի համարձակ որոշման» շնորհիվ, իրավիճակը փոխվել է։
