Հռոմի Լևոն XIV պապը հայտարարել է, որ Մերձավոր Արևելքի հակամարտության հետևանքով պատճառված մահն ու տառապանքը «խայտառակություն են ամբողջ մարդկության համար», փոխանցում է Vatican News-ը։
Վատիկանի Սուրբ Պետրոսի հրապարակում ավանդական կիրակնօրյա քարոզի ժամանակ Հռոմի պապը հայտարարել է, որ շարունակում է տագնապով հետևել Մերձավոր Արևելքի իրավիճակին։
«Մենք չենք կարող լուռ մնալ այսքան մարդկանց՝ այս հակամարտությունների անպաշտպան զոհերի տառապանքների առջև։ Այն վերքեր է հասցնում նրանց, վերքեր է հասցնում ամբողջ մարդկությանը։ Այս պատերազմների պատճառած մահն ու ցավը խայտառակություն են մարդկային ընտանիքների համար»,- ընդգծել է Լևոն XIV-ը։
Նա հավատացյալներին կոչ է արել «անդադար աղոթել»՝ ռազմական գործողությունները դադարեցնելու համար։
Ավելի վաղ Լևոն XIV-ը բազմիցս արտահայտվել էր Մերձավոր Արևելքի հակամարտության մասին՝ համաշխարհային առաջնորդներին կոչ անելով բարոյական պատասխանատվություն կրել ընդունվող որոշումների համար։ Խոսելով «բռնության պարուրաձև աճի» մասին՝ նա հավատացյալներին կոչ էր արել աղոթել, որպեսզի «ռումբերի որոտը դադարի, զենքերը լռեն, և տարածք բացվի երկխոսության համար, որտեղ լսելի կլինի ժողովուրդների ձայնը»։
ԱՄՆ-ն ու Իսրայելը փետրվարի 28-ին լայնածավալ ռազմական գործողություն են սկսել Իրանի դեմ: Հարվածների թիրախում էին Իրանի միջուկային օբյեկտները, ինչպես նաև երկրի ռազմական ենթակառուցվածքները: Գործողության արդյունքում զոհվել են Իրանի բարձրաստիճան զինվորականներ և պաշտոնյաներ, այդ թվում՝ Իրանի հոգևոր առաջնորդ Ալի Խամենեին, Պաշտպանության նախարար Ազիզ Նասիրզադեն և Իրանի զինված ուժերի գլխավոր շտաբի պետ Աբդոլ Ռահիմ Մուսավին: Իրանի Կարմիր մահիկի ընկերության տվյալներով՝ հարվածների հետևանքով զոհվել է ավելի քան 1500 մարդ, վիրավորվել՝ շուրջ 3000-ը:
Իրանն ի պատասխան՝ հարվածներ էր հասցրել տարածաշրջանի մի շարք երկրներում ԱՄՆ-ի և Իսրայելի թիրախներին: Հարվածներ են հասցվել Բահրեյնում, Հորդանանում, Կատարում, Քուվեյթում, Արաբական Միացյալ Էմիրություններում և Սաուդյան Արաբիայում գտնվող ամերիկյան ռազմակայաններին ու դիվանագիտական ներկայացուցչություններին:
