ՀՀ վարչապետ Նիկոլ Փաշինյանը, արձագանքելով Ադրբեջանից վառելիքի մատակարարման քննադատությանը, հայտարարել է, որ ադրբեջանական բենզինի ներմուծումը հանգեցրել է երկրում վառելիքի գների նվազմանը:
Նրա խոսքով՝ 2025 թվականի դեկտեմբերի կեսերից պրեմիում դասի բենզինի գինը նվազել է 15%-ով՝ մեկ լիտրի համար 510 դրամից հասնելով 430 դրամի։ Վարչապետը հստակեցրել է, որ երկու օր առաջ Ադրբեջանից դիզելային վառելիք էր ներկրվել։ Այս ընթացքում դիզելային վառելիքի նվազագույն գինը նվազել է 2%-ով, իսկ սովորական բենզինի գինը, դեկտեմբերի համեմատ, մոտ 8%-ով. եթե դեկտեմբերի 11-ին այն կազմում էր 500 դրամ, ապա այժմ՝ 460 դրամ մեկ լիտրի համար, պարզաբանել է նա։
Փաշինյանը նշել է, որ այն, ինչ տեղի է ունենում, խաղաղության օրակարգի և խաղաղության տնտեսական օգուտների արդյունքն է: Ընդ որում, նրա խոսքով, քննադատական դիտողություններ են հնչում ինչպես Հայաստանում, այնպես էլ Ադրբեջանում։ Վարչապետը կարծում է, որ այդ մտահոգությունները տեղին չեն, քանի որ, ինչպես ինքն է պնդում, Հայաստանի և Ադրբեջանի միջև հաստատված է խաղաղություն, որն աստիճանաբար ինստիտուցիոնալացվելու է:
Նա նաև հայտարարել է, որ նման տրամադրությունները բորբոքվում են այն ընկերությունների կողմից, որոնք օտարերկրյա գործընկերների աջակցությամբ երկար ժամանակ վերահսկում էին բենզինի շուկան և այժմ կորցնում են մենաշնորհային դիրքը: Փաշինյանի խոսքով՝ այդ մենաշնորհներն, ի վերջո, կվերանան, ինչն օգուտ կբերի ՀՀ քաղաքացիներին։
Հայ-վրացական սահմանի «Այրում» կայանով 2025-ի դեկտեմբերին Ադրբեջանից Հայաստան էր ներմուծվել 1300 տոննա АИ-95 բենզին։ 22 ցիստեռն վառելիքն Ադրբեջան-Վրաստան-Հայաստան երթուղով էր հասցվել։
Ավելի ուշ հայտնի էր դարձել, որ ադրբեջանական բենզինը Հայաստան են ներկրում «Մեգա Թրեյդ» և «Շիշա Ուորլդ» ՍՊԸ-ները: «Մեգա Թրեյդ» ընկերությունը մտնում է իշխող կուսակցության պատգամավոր Խաչատուր Սուքիասյանի ընտանիքին պատկանող «Սիլ կապիտալի» խմբի մեջ:
ՀՀ էկոնոմիկայի նախարարը հունվարի 8-ին հայտարարել էր Ադրբեջանից «պրեմիում և սովորական» բենզինի ու դիզելի նոր խմբաքանակների ստացման մասին՝ ընդգծելով, որ նման մատակարարումները կարող են դառնալ կանոնավոր, այլ ոչ թե մեկանգամյա: Հունվարի 11-ին Բաքվից հայտնել էին Հայաստան նավթամթերքի երրորդ խմբաքանակի առաքման մասին:
