Ֆրանսիայում ձերբակալվել է բողոքի ակցիաների ավելի քան 300 մասնակից, հայտնում է France24-ը:
Նրանք մասնակցում էին սոցիալական աջակցության կրճատումների դեմ ուղղված ցույցերին։ Ակցիայի մասնակիցներից 134-ը կալանքի տակ է։ Ըստ Ֆրանսիայի ոստիկանության հաղորդագրության՝ ցույցերի ընթացքում տուժել է 26 մարդ։ Բողոքի գործողությունների ապահովման համար ներգրավված էր մոտ 80 հազար ոստիկան։
Սեպտեմբերի 19-ին Ֆրանսիայում անցկացվել է ավելի քան 250 ցույց, որոնց, ինչպես հաղորդել են ֆրանսիական լրատվամիջոցները, մասնակցել է ավելի քան մեկ միլիոն մարդ։ ՆԳՆ-ի տվյալներով՝ բողոքի ակցիաներին մասնակցել է ավելի քան 500 հազար ցուցարար, ովքեր պահանջում են չեղարկել բյուջետային այն միջոցառումները, որոնք ուղղված են սոցիալական աջակցության կրճատմանը, ինչպես նաև ավելացնել պետական ծառայությունների ֆինանսավորումը և բարձրացնել հարկերը ֆինանսապես ավելի ապահով մարդկանց համար։
RBC-ն գրում է, որ ցույցերին մասնակցում էին ուսուցիչներ, գնացքների մեքենավարներ, դեղագործներ և հիվանդանոցների աշխատակիցներ, որոնք գործադուլ էին հայտարարել։ Դեռահասները մի քանի ժամով շրջափակել էին տասնյակ ավագ դպրոցներ։
Նորանշանակ վարչապետ Սեբաստիեն Լըկորնյուն խոստացել է առաջիկա օրերին հանդիպել արհմիությունների հետ՝ նշելով․ «Արհմիությունների ներկայացուցիչների պահանջները, որոնք կրկնվել են նաև ցուցարարների կողմից, իմ սկսած խորհրդակցությունների առանցքում են»:
Ցույցերի արդեն երրորդ օրն է: 2026 թվականի բյուջեի օրինագծում առաջարկվող խնայողության միջոցառումների դեմ ցույցեր էին տեղի ունեցել նաև նախորդ շաբաթ։ Հուլիսին Ֆրանսիայի այն ժամանակվա վարչապետ Ֆրանսուա Բայրուն ներկայացրել էր 2026-ի բյուջեի նախագիծը, ըստ որի՝ իշխանությունները մտադիր են մի շարք բյուջետային կետերի վրա խնայել շուրջ 43,8 մլրդ եվրո՝ նախկինում նախատեսված 40 մլրդի փոխարեն։
