ԱՄՆ նախագահ Դոնալդ Թրամփի վարչակազմը գաղտնի հազարավոր Starlink տերմինալներ է ուղարկել Իրան՝ զանգվածային բողոքի ցույցերի ժամանակ իրանական ինտերնետի անջատումների ֆոնին, հայտնել է The Wall Street Journal-ը՝ հղում անելով ԱՄՆ պաշտոնյաներին։
Ըստ թերթի՝ ԱՄՆ-ն Իրան է ուղարկել մոտ 6000 Starlink տերմինալ։ Թերթը նշում է, որ սա ԱՄՆ կառավարությունից Իրան տերմինալների առաջին ուղղակի առաքումն է։
Մինչ այդ, ԱՄՆ պետքարտուղարությունը գնել էր մոտ 7000 Starlink սարք՝ Իրանի ակտիվիստներին ինտերնետի անջատումները շրջանցելուն օգնելու համար։ WSJ-ն նշում է, որ Թրամփը տեղյակ էր Starlink-ի Իրան առաքումների մասին։
Թերթը գրում է, որ ԱՄՆ-ն հերքում է Իրանում տեղի ունեցած բողոքի ալիքին իր մասնակցությունը, սակայն Starlink արբանյակների առաքումը ցույց է տալիս, որ Թրամփի վարչակազմն աջակցել է հակակառավարական գործունեությանը։
Իրանում Starlink-ի օգտագործումն անօրինական է, և ենթադրում է երկարատև ազատազրկում: Այնուամենայնիվ, ըստ ակտիվիստների և վերլուծաբանների, տասնյակ հազարավոր իրանցիներ արդեն օգտագործում են արբանյակային տերմինալները, հաղորդում է WSJ-ն: Ի պատասխան՝ Իրանի իշխանությունները խուզարկություններ են անցկացնում տներում և տանիքներում՝ փնտրելով Starlink-ի օգտագործման ապացույցներ:
Զանգվածային բողոքի ցույցերն Իրանում սկսվել էին 2025 թվականի դեկտեմբերին: Հունվարի 8-ին՝ անկարգությունների ֆոնին, Իրանի կառավարությունն անջատել էր ինտերնետը և բջջային կապը երկրում: Ըստ Bloomberg-ի՝ Իլոն Մասկի ամերիկյան SpaceX ընկերությունն իր Starlink արբանյակային ծառայությունն անվճար էր դարձրել Իրանում՝ համազգային ինտերնետի անջատման ֆոնին:
