«Շողակաթ» կրթամշակութային հեռուստաալիքը կդադարի ունենալ հանրային հեռարձակողի կարգավիճակ և կզրկվի պետական ֆինանսավորումից, քանի որ չի կատարել իր պարտավորությունները և 2020 թվականի օրենսդրական փոփոխություններից հետո շարունակել է իրեն դիրքավորել որպես հոգևոր ալիք: Այս մասին հայտարարել է Հայաստանի Հեռուստատեսության և ռադիոյի հանձնաժողովի նախագահ Տիգրան Հակոբյանը։
«Կրթական-մշակութային ալիքում չպետք է լինեն հոգևոր-կրոնական հաղորդումներ, հասկանո՞ւմ եք, որովհետև կրթությունն ու մշակույթը շատ ժամանակ կրոնի կամ կղերական մոտեցումների հետ ոչ մի կապ չպետք է ունենան: Բայց մեր հասարակությունը, մենք բոլորս դրա վրա ուշադրություն չդարձրինք։ Չձևափոխվեց նաև «Շողակաթ»-ը: Ես կարծում եմ՝ եթե «Շողակաթ»-ը կատարեր իր առաքելությունը և իր օրենսդրական պարտավորությունը, սրան չէինք հասնի: Կարծում եմ՝ չի կարելի նույնիսկ հոգևոր կոչվող ալիքում Աստծո առաքելությունից խոսել և ցույց տալ քաղաքական բովանդակություն: Սա երկար չէր կարող տևել»,- ասել է Հակոբյանը խորհրդարանում կայացած ճեպազրույցի ժամանակ։
Միևնույն ժամանակ՝ ՀՌՀ նախագահը նշել է, որ հանձնաժողովը չի կիսում «Քաղաքացիական պայմանագիր» խորհրդարանական խմբակցության դիրքորոշումը հեռուստաալիքի նկատմամբ և կարծում է, որ կարելի էր ավելի արդյունավետ և կոռեկտ լուծում գտնել: Նա պարզաբանել է, որ «Շողակաթը» կարող է շարունակել աշխատանքը և լիցենզիա ստանալ, իսկ չստանալու դեպքում կարող է մնալ մալուխային օպերատորների փաթեթներում, որոնք ընդգրկում են Հայաստանի բնակչության մոտ 80%-ը:
Փաստորեն՝ ալիքը կորցնում է պետական ֆինանսավորման միայն մի մասը, ընդգծել է Հակոբյանը։
Այս որոշումը մեկնաբանել է նաև ԿԳՄՍ նախարար Ժաննա Անդրեասյանը: Նա նշել է, որ մրցութային գործընթացները թույլ են տալիս նոր և թարմ գաղափարներ բերել, իսկ ընտրության մեծ բազմազանությունը, ի վերջո, ձեռնտու է հենց լսարանին, քանի որ բարձրացնում է բովանդակության որակը:
Նրա խոսքով՝ այսօր դեռահասների միայն մի փոքր մասն է հեռուստացույց դիտում, ուստի իշխանությունները պետք է մտածեն կրթական և մշակութային բովանդակության տարածման մասին այն հարթակներում, որտեղ այն իսկապես հասնում է լսարանին:
«Բուն բովանդակության փաստն ամենևին էլ վտանգված չէ, որովհետև բովանդակությունը շարունակելու է մնալ կրթական-մշակութային, հոգևոր, փոխվում է եղանակը՝ ինչպես ստանալ այդ բովանդակությունը: Դա արվելու է մրցութային եղանակով, այնպես որ, չեմ կարծում, որ այստեղ կրթական և մշակութային բովանդակության տեսանկյունից որևէ վտանգ կունենանք»,- ընդգծել է Անդրեասյանը:
Նախարարը նաև մերժել է գործընթացի քաղաքական ենթատեքստի մասին ենթադրությունները՝ նշելով, որ իշխանությունների գործողություններն ուղղված են բովանդակության որակի բարձրացմանը, և մրցույթները կապահովեն ավելի որակյալ արտադրանքի ստեղծում:
Ազգային ժողովը հոկտեմբերի 24-ին ամբողջությամբ ընդունել էր «Տեսալսողական մեդիայի մասին» օրենքում կատարված փոփոխությունները, որոնց համաձայն՝ հանրային հեռարձակողների թիվը երեքից կկրճատվի երկուսի: Միաժամանակ՝ վերացվում է կրթական և մշակութային ծրագրերի պարտադիր առկայության պահանջը։ Ընդունված փոփոխություններն ուժի մեջ կմտնեն 2026 թվականի հունվարի 1-ից։ Ներկայումս Հանրային հեռարձակողի կարգավիճակ ունի «Շողակաթ» հոգևոր-մշակութային հեռուստաալիքը: Օրենքում ընդունված փոփոխությունները չեն ենթադրում հեռուստաալիքի փակում, բայց կհանգեցնեն դրա պետական ֆինանսավորման դադարեցմանը: «Շողակաթը» կարող է շարունակել հեռարձակումը, եթե մասնակցի և հաղթի հանրային մուլտիպլեքսում լիցենզիա ստանալու նոր մրցույթին:
