ՀՀ վարչապետ Նիկոլ Փաշինյանի Կրեմլում հանդիպել է ՌԴ նախագահ Վլադիմիր Պուտինի հետ և քննարկել Հայկական ատոմակայանի (ՀԱԷԿ) աշխատանքը, հայտնել է ՌԴ նախագահի մամուլի ծառայությունը:
Պուտինի խոսքով՝ Երևանի մասնակցությունը «Միջազգային ատոմային շաբաթ» ֆորումին «լիովին տրամաբանական» է, քանի որ գործող ՀԱԷԿ-ն ապահովում է ՀՀ-ի էլեկտրաէներգիայի մոտ 30 տոկոսը։
ՌԴ նախագահը դա «լուրջ ցուցանիշ» է որակել՝ շեշտելով, որ այն Հայաստանի տնտեսության մեջ ատոմային էներգետիկայի կարևոր դերի ապացույց է։
Փաշինյանը նշել է, որ ատոմային էներգետիկայի դերը շարունակաբար աճում է, և այսօր այն դիտարկվում է որպես էկոլոգիապես մաքուր էներգիա։ Վարչապետի խոսքով՝ այս ոլորտը նաև Հայաստանի համար առանցքային նշանակություն ունի։
Նա ընդգծել է, որ Երևանը սերտորեն համագործակցում է Ռուսաստանի հետ և աշխատում է ՀԱԷԿ-ի շահագործման ժամկետը երկարաձգելու ուղղությամբ մինչև 2036 թվականը։
«Բացի այդ, մենք ուսումնասիրում ենք փոքր մոդուլային ռեակտորների նախագծերը, և այս հարցում ևս ակտիվ երկխոսություն ենք վարում Ռուսաստանի հետ։ Շատ արդյունավետ համագործակցում ենք «Ռոսատոմ» կորպորացիայի հետ»,- ասել է Փաշինյանը։
Պուտինը նաև նշել է, որ երկու երկրների միջև ապրանքաշրջանառությունը հասել է ռեկորդային՝ 11,7 մլրդ դոլարի, ինչը կազմում է Հայաստանի արտաքին առևտրի 3-4%-ը։
«Հարաբերությունները զարգանում են, և միշտ քննարկելու թեմաներ ունենք»,- հավելել է ՌԴ նախագահը։
Փաշինյանն, իր հերթին, հավելել է, որ ընդհանուր առմամբ՝ երկու երկրների հարաբերությունները հետևողականորեն զարգանում են։ Նրա խոսքով՝ թեև այս տարի երկկողմ առևտրաշրջանառությունը գլոբալ գործընթացների հետևանքով որոշ չափով նվազել է, կարևոր է աշխատել այս ուղղությամբ, որպեսզի առևտուրը պահպանվի 2023 և 2024 թվականներին արձանագրված աճի տեմպերով։
Փաշինյանը շնորհակալություն է հայտնել Պուտինին ֆորումին մասնակցելու հրավերի համար և ընդգծել, որ հայ-ռուսական հարաբերությունների օրակարգը շարունակում է մնալ հագեցած, իսկ կողմերը միշտ ունեն քննարկելու լայն շրջանակի հարցեր։
Սեպտեմբերի 25-ին Փաշինյանը ժամանել էր Մոսկվա՝ մասնակցելու «Համաշխարհային ատոմային շաբաթ» ֆորումին։ Վարչապետը ֆորումին հայտարարել էր, որ ՀԱԷԿ-ի անվտանգ շահագործումը ՀՀ իշխանությունների համար ռազմավարական առաջնահերթություն է։ Նա նշել էր, որ Երևանը մտադիր է սերտ համագործակցություն զարգացնել ԱԷՄԳ-ի և գործընկեր երկրների հետ՝ գործող էներգաբլոկը փոխարինելու օպտիմալ լուծում գտնելու համար։
Հայաստանում Ռուսաստանի դեսպան Սերգեյ Կոպիրկինը հայտարարել էր, որ ռուսական կողմը պատրաստ է Հայաստանին առաջարկել ատոմային էներգաբլոկների լայն տեսականի՝ սկսած փոքր հզորության մոդուլային բլոկներից մինչև խոշոր ռեակտորներ։
