Հայաստանն ու Իրանը ներկայումս աշխատում են համապարփակ ռազմավարական փաստաթղթի վրա, որը կստորագրեն երկու երկրների ղեկավարները, Երևանում կայացած մամուլի ասուլիսում հայտնել է Հայաստանում Իրանի դեսպան Մեհդի Սոբհանին։
Դեսպանի խոսքով՝ փաստաթուղթը լինելու է համապարփակ և երկարաժամկետ, վերաբերելու է Հայաստանի և Իրանի համատեղ երկարաժամկետ ծրագրերին և պայմաններ է ստեղծելու բոլոր ոլորտներում երկկողմ հարաբերությունների զարգացման համար։
«Փաստաթղթում զետեղված կլինեն առկա իրողությունները, հնարավորություններն ու ներուժը»,- ասել է դիվանագետը։
Նա հավելել է, որ Երևանի և Թեհրանի փոխգործակցությունը գիտության և մշակույթի ոլորտում ծրագրերի իրականացման շրջանակներում երկու երկրների հարաբերությունների անբաժանելի մասն է, և Իրանն այդ ոլորտներում փոխգործակցությունը համարում է հանրային կապիտալ։
Իրանի դեսպանն անդրադարձել է նաև երկու երկրների միջև առևտրատնտեսական համագործակցության ընդլայնմանը և նշել Արաքս գետի վրա երկրորդ կամուրջ կառուցելու անհրաժեշտությունը։ Նա նշել է, որ նման եզրակացության է եկել՝ հիմնվելով երկու երկրների միջև մարդկանց սահմանային տեղաշարժի և տրանսպորտի վերաբերյալ վիճակագրական տվյալներին։
«Վերջին 10 ամվա ընթացքում երկու երկրների միջև 231 հազար 293 քաղաքացու փոխայցեր են կատարվել, որից 66 հազար 593-ը Հայաստան այցելած Իրանի քաղաքացիներն են, 164 հազար 700-ը՝ սահմանը հատած Հայաստանի քաղաքացիները»,- մանրամասնել է իրանցի դիվանագետը։
Դեսպանը նաև հիշեցրել է Թեհրանի մտադրությունը՝ առաջին փուլում երկու երկրների միջև 75 միլիոն դոլարի առևտրաշրջանառությունը հասցնել 1 միլիարդ դոլարի և աշխատել այդ թիվը հասցնել 3 միլիարդ դոլարի, ինչը կարող է նաև նպաստել ԵԱՏՄ շրջանակներում երկրների փոխգործակցությանը։
