Մոսկվայում ընթացող բանակցությունների ժամանակ Ռուսաստանի և Ադրբեջանի արտաքին գործերի նախարարներ Սերգեյ Լավրովը և Ջեյհուն Բայրամովը արձանագրել են «3+3» ձևաչափի նկատմամբ հետաքրքրության մասին, փոխանցել է «ՌԻԱ Նովոստի»-ն։
ՌԴ արտգործնախարարը հատուկ ընդգծել է, որ կողմերն արձանագրել են հետաքրքրության վերադարձը «3+3» խորհրդատվական հարթակի նկատմամբ, որին մասնակցում են Ռուսաստանը, Ադրբեջանը, Հայաստանը, Իրանը, Թուրքիան և Վրաստանը։
«Մենք անպայման կքննարկենք Հարավային Կովկասում ստեղծված իրավիճակը։ Մենք նշեցինք «3+3» տարածաշրջանային համագործակցության հարթակի (Ռուսաստանի, Ադրբեջանի, Հայաստանի, Իրանի, Թուրքիայի և Վրաստանի մասնակցությամբ տարածաշրջանային խորհրդակցական ձևաչափ - խմբ.) նկատմամբ վերադարձը և աճող հետաքրքրությունը», - նշել է նա։
Լավրովը պարզաբանել է, որ կողմերը նախատեսում են վերանայել տնտեսական համագործակցության ներկայիս վիճակը՝ հաշվի առնելով ապրիլին կայացած միջկառավարական հանձնաժողովի 24-րդ նիստը, ինչպես նաև մշակութային և մարդասիրական նախագծերի հեռանկարները։ Նախարարները կքննարկեն նաև համագործակցությունը ԵԱՀԿ-ի, ՄԱԿ-ի և ԱՊՀ-ի շրջանակներում։
ՌԴ ԱԳՆ պաշտոնական ներկայացուցիչ Մարիա Զախարովան հուլիսի 15-ին հայտարարել էր, որ Ռուսաստանը հույս ունի, որ Հայաստանն ու Ադրբեջանը կկարողանան համաձայնեցնել «3+3» տարածաշրջանային հարթակի արտգործնախարարների հաջորդ հանդիպման անցկացման հերթականությունը։
