Նոյեմբերի 17-ին՝ ժամը 10։00, Հակակոռուպցիոն դատարանում տեղի կունենա «Տաշիր» ընկերությունների խմբի նախագահ, բարերար Սամվել Կարապետյանի կալանքի երկարաձգման միջնորդության քննությունը՝ դատավոր Սարգիս Դադոյանի նախագահությամբ, հայտնել է նրա փաստաբան Արամ Վարդևանյանը։
Վարդևանյանը նշել է, որ Վերաքննիչ դատարանը նոյեմբերի 13-ին մերժել է և՛ փաստաբանների, և՛ դատախազության միջնորդությունները, որոնք վերաբերում էին Կարապետյանի կալանքի ժամկետներին։
«Վերաքննիչ դատարանն արձանագրել է, որ մեր կողմից ներկայացված մի շարք փաստարկներ ընդունելի են։ Նա արձանագրել է, որ նման իրավիճակում այլևս կալանքի նման շարունակականությունը, տևողությունը չի կարող լինել համաչափ։ Կարելի է ասել, այստեղից հետևությունը նա է, որ թեև Վերաքննիչ դատարանը մերժեց մեր բողոքը, բայց այնպիսի իրավական դիրքորոշում արձանագրեց, որի պայմաններում կալանքի շարունակականության լրջագույն դժվարություն ունեն իրավապահ մարմինները»,- պարզաբանել է Վարդևանյանը։
Հունիսին «Տաշիր» ընկերությունների խմբի նախագահին կալանավորել էին եկեղեցու դեմ արշավը քննադատելուց հետո: Դատարանն օգոստոսի 15-ին երկու ամսով երկարացրել էր նրա կալանքը։ Ավելի ուշ Վերաքննիչ դատարանը մերժել էր փաստաբանների բողոքը խափանման միջոցը փոխելու վերաբերյալ՝ գործարարի կալանքն ուժի մեջ թողնելով մինչև հոկտեմբեր: Դատարանը հոկտեմբերի 16-ին 30 օրով երկարաձգել էր նրա կալանքի ժամկետը:
Նոյեմբերի 13-ին ՔԿ-ն Կարապետյանի կալանքը 2 ամսով երկարաձգելու միջնորդություն էր ներկայացրել դատարան։ Վերաքննիչ դատարանն անփոփոխ էր թողել Հակակոռուպցիոն դատարանի որոշումը։
