Հունգարիայի ընդդիմադիր «Տիսա» կուսակցությունն՝ Պետեր Մագյարի առաջնորդությամբ, հաղթել է Հունգարիայի խորհրդարանական ընտրություններում, BBC-ի հաղորդմամբ՝ վկայում են պաշտոնական տվյալները:
Կենտրոնական ընտրական հանձնաժողովի տվյալներով՝ գործող վարչապետ Վիկտոր Օրբանի «Ֆիդես» կուսակցությունն ստացել է ընտրողների ձայների 37,8%-ը, իսկ «Տիսան»՝ 53,6%-ը: Սա բավարար է սահմանադրական մեծամասնություն կազմելու համար:
«Միասին մենք վերջ դրեցինք Օրբանի ռեժիմին, ազատագրեցինք Հունգարիան»,- արդյունքների հրապարակումից հետո հայտարարել է Մագյարը:
Արդեն 16 տարի երկիրը ղեկավարող Օրբանը, իր հերթին, ընդունել է արդյունքները, շնորհավորել մրցակցին: Նա հայտարարել է, որ այս արդյունքները ցավոտ են:
Եվրոպական երկրների ղեկավարները շնորհավորել են Մագյարին Հունգարիայի խորհրդարանական ընտրություններում տարած հաղթանակի կապակցությամբ:
«Ֆրանսիան ողջունում է ժողովրդավարական մասնակցության հաղթանակը, հունգարացի ժողովրդի հավատարմությունը Եվրամիության արժեքներին և Հունգարիայի հավատարմությունը Եվրոպային։ Եկեք միասին առաջ շարժվենք դեպի ավելի ինքնիշխան Եվրոպա՝ հանուն մեր մայրցամաքի անվտանգության, մեր մրցունակության և մեր ժողովրդավարության»,- հայտարարել է Ֆրանսիայի նախագահ Էմանուել Մակրոնը:
Նա հավելել է, որ անձամբ շնորհավորել է Մագյարին հաղթանակի կապակցությամբ։
Իտալիայի վարչապետ Ջորջա Մելոնին սոցցանցի իր գրառման մեջ շնորհավորել է Մագյարին «ընտրություններում համոզիչ հաղթանակի» կապակցությամբ:
«Հունգարիա, Լեհաստան, Եվրոպա, կրկին միասին»,- գրել է Լեհաստանի վարչապետ Դոնալդ Տուսկը սոցցանցում։
Իր հերթին՝ Էստոնիայի վարչապետ Քրիստեն Միխալը հայտարարել է. «Հունգարացիները պատմական ընտրություն են կատարել՝ հօգուտ ազատ և ուժեղ Հունգարիայի միավորված Եվրոպայի կազմում՝ մերժելով այն ուժերին, որոնք անտեսում են իրենց շահերը»:
Մեծ Բրիտանիայի վարչապետ Քիր Սթարմերը հայտարարել է, որ Մագյարի հաղթանակը «պատմական պահ է ոչ միայն Հունգարիայի, այլև եվրոպական ժողովրդավարության համար»:
Գերմանիայի կանցլեր Ֆրիդրիխ Մերցը դիմել է Մագյարին. «Եկեք միավորենք ուժերն ուժեղ, անվտանգ և, առաջին հերթին, միասնական Եվրոպա ստեղծելու համար»:
