«Հայաստանի էլեկտրական ցանցեր» ՓԲԸ-ն տուգանվել է 20 միլիոն դրամով (51 000 դոլար)։ Որոշումը կայացվել է Հանրային ծառայությունները կարգավորող հանձնաժողովի կողմից՝ ընկերության կողմից հավաստի և ամբողջական տեղեկատվություն տրամադրելու պարտավորությունների հնարավոր խախտումը հետաքննելու վարչական վարույթի շրջանակներում։
«Հարուցված վարչական վարույթի արդյունքում հաստատվել է ընկերության կողմից ոչ հավաստի և ոչ սպառիչ տեղեկություն ներկայացնելու փաստը, ինչը ընկերության կողմից ևս ընդունվել է»,- գրել է ՀԾԿՀ-ն։
Օգոստոսի 24-ին ԶԼՄ-ն տեղեկացել էր «Քաղաքացիական պայմանագրի»՝ Էլեկտրական ցանցերի ազգայնացման ծրագրի մասին։ Օգոստոսի 22-ին ՀԾԿՀ նախագահ Գարեգին Բաղրամյանը նշել էր Արաբկիրում և Կենտրոնում հոսանքի անջատումների ավելացման պատճառը։
Հուլիսի 6-ին ՆԳՆ մամուլի քարտուղար Նարեկ Սարգսյանն Armenia Today-ին հայտնել էր, որ հրդեհ էր բռնկվել Հրազդանի կիրճում գտնվող Երևանի հիդրոէլեկտրակայանում։ Նա ասել էր, որ հրդեհի պատճառը մալուխի բռնկումն էր: ՀԷԿ-ում բռնկված հրդեհի պատճառով Երևանի մի մասը մնացել էր առանց էլեկտրականության։
Հուլիսի 9-ին ՀԷՑ-ը երևանցիներին նախազգուշացրել էր հիդրոէլեկտրակայանում բռնկված հրդեհից հետո հոսանքազրկումների մասին։ Ընկերությունը վստահեցրել էր, որ միջոցներ է ձեռնարկում խնդիրը հնարավորինս արագ կարգավորելու համար։ Հուլիսի 13-ին ՀԷՑ-ից Armenia Today-ին հայտնել էին, որ ընկերությունը նախատեսում է կարճ ժամկետներում ամբողջությամբ վերացնել «Երևանի ՀԷԿ 1»-ում տեղի ունեցած հրդեհի հետևանքները։
