Վենեսուելայում տեղի ունեցած երկու երկրաշարժերի զոհերի թիվը հասել է 4829-ի, վիրավորների թիվը մնացել է անփոփոխ՝ 16 740, իսկ 17 907 մարդ շարունակում է մնալ անօթևան, հայտնում է Reuters-ը՝ հղում անելով երկրի Ազգային ժողովի նախագահ Խորխե Ռոդրիգեսի հրապարակմանը։
Վենեսուելայի իշխանությունների վերջին տվյալներով՝ երկրաշարժերի հետևանքով վնասվել է 856 շենք, որոնցից 190-ն ամբողջությամբ փլուզվել կամ կառուցվածքային լուրջ վնասներ է կրել։ Կառավարության նախնական գնահատականով՝ տուժածների բնակարանային կարիքները հոգալու համար անհրաժեշտ է կառուցել շուրջ 25 հազար տուն։ Իշխանություններն արդեն Օսմա և Չուսպա շրջաններում առանձնացրել են շուրջ 40 հողատարածք։
ՄԱԿ-ի զարգացման ծրագրի տվյալներով՝ Լա Գուայրայի առավել տուժած շրջաններում կուտակվել է շուրջ 1,2 մլն տոննա փլատակ։ Որոշ բնակիչներ սեփական միջոցներով ծանր տեխնիկա են վարձակալում՝ փլատակներից հարազատների մարմինները դուրս բերելու համար, քանի որ փրկարարներն արդեն հեռացել են երկրից։
Առողջապահության համաշխարհային կազմակերպությունը հայտնել է, որ Վենեսուելայի առողջապահական համակարգը գործում է ծայրահեղ ծանրաբեռնվածության պայմաններում։ Անօթևան մնացած մարդկանց շրջանում սանիտարական պայմանների բացակայությունը մեծացրել է ջրով փոխանցվող վարակների և պատվաստումներով կանխարգելվող հիվանդությունների տարածումը։
ՄԱԿ-ը մոտ 300 մլն դոլարի մարդասիրական օգնության կոչ է ներկայացրել՝ առաջիկա վեց ամիսներին երկրաշարժերից տուժած շուրջ 1,3 մլն մարդու աջակցելու համար։ ՄԱԿ-ի Աղետների ռիսկի նվազեցման գրասենյակը բնակարաններին և ենթակառուցվածքներին հասցված ուղղակի ֆիզիկական վնասը գնահատել է շուրջ։ Վնասը ՄԱԿ-ը գնահատել է շուրջ 37 մլրդ դոլլարի։
Եվրամիությունը հուլիսի 15-ին հայտարարել է Վենեսուելային լրացուցիչ 20 մլն եվրոյի մարդասիրական օգնություն տրամադրելու մասին։ Գումարը նախատեսված է բժշկական սարքավորումների ձեռքբերման և որոնողափրկարարական խմբերի աշխատանքի ֆինանսավորման համար։ Այն կավելանա հունիսին հատկացված 5 մլն եվրոյին և տարեսկզբին Վենեսուելայի համար հայտարարված 52 մլն եվրո։
Associated Press-ի տվյալներով՝ ԱՄՆ-ում գործող Global Empowerment Mission կազմակերպությունը Վենեսուելա է ուղարկել շուրջ 454 հազար կգ մարդասիրական օգնություն։ Կազմակերպության երեք պահեստում աշխատել է մինչև հազար կամավոր, իսկ օգնության խմբաքանակների փոխադրումը Վենեսուելա կազմակերպվել է ԱՄՆ Պետդեպարտամենտի աջակցությամբ։
The Guardian-ը հայտնել է աղետի հետևանքների վերացման աշխատանքների վերաբերյալ հասարակական դժգոհության աճի մասին։ Տուժած բնակիչները հայտարարել են, որ առաջին օրերին ստիպված են եղել սահմանափակ գործիքներով ինքնուրույն որոնել փլատակների տակ մնացած հարազատներին։
Վենեսուելայում հունիսի 24-ին տեղի էին ունեցել 7,2 և 7,5 մագնիտուդով երկու երկրաշարժ։ Առավել շատ տուժել էին Կարակասի մերձակայքի շրջաններն ու Լա Գուայրայի ափամերձ նահանգը։ Մեծի Տանն Կիլիկիո կաթողիկոսությունը հայտնել էր անհետ կորած և վիրավոր հայերի մասին, ինչպես նաև երկու հայ ընտանիքի տների փլուզման մասին։
Հուլիսի 2-ին երկրում յոթօրյա ազգային սուգ էր հայտարարվել։ Ավելի ուշ Armenia Today-ն հայտնել էր, որ երկրաշարժերից տուժել է ավելի քան 68 հազար մարդ, վնասվել կամ ոչնչացվել է շուրջ 60 հազար շինություն, իսկ ժամանակավոր կացարաններում մաքուր ջրի և սանիտարական պայմանների բացակայության պատճառով աճել է վարակիչ հիվանդությունների վտանգը։
