Մոսկվայի Տագանսկի շրջանային դատարանը բավարարել է քննության միջնորդությունը և երկարաձգել Հայրենիքի պաշտպանների հիշատակը վիրավորելու մեջ մեղադրվող բլոգեր Արսեն Մարգարյանի կալանքի ժամկետը, հայտնում է ՏԱՍՍ-ը։
«Դատարանի որոշմամբ՝ մեղադրյալ Մարգարյանի կալանքի ժամկետը երկարաձգվել է մինչև նոյեմբերի 9-ը»,- ասվում է դատարանի որոշման մեջ։
Դատական նիստի ընթացքում փաստաբանը նշել է, որ Մարգարյանը զղջացել է, պատրաստ է համագործակցել քննության հետ և ներկայանալ անհրաժեշտության դեպքում։ Պաշտպանական կողմը տնային կալանք էր առաջարկել։
Մարգարյանը հայտարարել է, որ ձերբակալման ժամանակ ինքը չի թաքնվել մեքենայի բեռնախցիկում, այլ նստած էր ուղևորի նստատեղին։ Նա հավելել է, որ իրեն չեն տեղեկացրել հետախուզման մեջ գտնվելու մասին և չի պլանավորել արտասահման մեկնել։
Մարգարյանը ձերբակալվել էր օգոստոսի 23-ին։ Օգոստոսի 25-ին Մոսկվայի դատարանը 17 օրով կալանավորել էր բլոգերին։
2024 թվականին Անվտանգ ինտերնետի լիգայի ղեկավար Եկատերինա Միզուլինան հայտարարել էր բլոգերի դեմ դատախազություն բողոք ներկայացնելու մտադրության մասին՝ կանանց մասին նրա խոսքերի պատճառով: Մասնավորապես, «առցանց խորհրդակցություններից» մեկի ժամանակ նա պնդել էր, որ «օգտակար փորձ է մեկին բռնաբարելը»։ Մարգարյանը հայտնի է կանանց նկատմամբ ատելության դրսևորումներով և տասնյակ հազարավոր անդամներ ունեցող փակ համայնք ստեղծելով, որը, ըստ լրատվամիջոցների տեղեկությունների, նրան խոշոր եկամուտ է բերում։
2024 թվականի սեպտեմբերին սոցիալական ցանցերում դժգոհությունից հետո չեղարկվել էր Մարգարյանի մասնակցությունը Երևանում նախատեսված բիզնես դասախոսություններին։ Կազմակերպիչները որոշումը բացատրել էին սպառնալիքներով և «սպասվող սադրանքներով»։ Մարդու իրավունքների պաշտպաններն ու հասարակական գործիչները հանդես էին եկել բլոգերի ելույթի դեմ՝ հիշելով նրա «սեքսիստական և հակահայկական հայտարարությունները»։
