Մեծ Բրիտանիան, Ֆրանսիան և Գերմանիան սկսել են Իրանի դեմ 2015 թվականի միջուկային համաձայնագրով վերացված պատժամիջոցների վերականգնման գործընթաց, հայտնում է ՏԱՍՍ-ը։
Երեք երկրի Արտաքին գործերի նախարարները համատեղ հայտարարության մեջ նշել են, որ «Եվրաեռյակը» տեղեկացրել է ՄԱԿ-ի Անվտանգության խորհրդին այդ մասին: Հայտարարության մեջ ասվում է, որ Իրանը «շոշափելիորեն չի կատարում Համատեղ համապարփակ գործողությունների ծրագրի շրջանակներում ստանձնած իր պարտավորությունները, ինչը հանգեցնում է վերականգնման մեխանիզմի ակտիվացմանը»:
Միևնույն ժամանակ, եվրոպական երկրները հայտարարել են Իրանի միջուկային ծրագրի շուրջ բանակցությունները 30 օրով շարունակելու պատրաստակամության մասին՝ ՄԱԿ-ի Անվտանգության խորհրդի 2231 բանաձևը երկարաձգելու համար, որը նախատեսում է Թեհրանի դեմ պատժամիջոցների վերացում, որի ժամկետը լրանում է հոկտեմբերի 18-ին:
Իրանի բարձրաստիճան պաշտոնյան Reuters-ին ասել է, որ Թեհրանը չի զիջի պատժամիջոցների վերականգնման մեխանիզմը գործարկելու եվրոպական երկրների ճնշմանը:
«Այս քայլը դիվանագիտության դեմ ուղղված գործողություն է, այլ ոչ թե դրա հնարավորություն։ Եվրոպայի հետ դիվանագիտությունը կշարունակվի»,- միաժամանակ ասել է աղբյուրը։
ԱՄՆ պետքարտուղար Մարկո Ռուբիոն ողջունել է եվրոպական երկրների որոշումը և հայտարարել, որ Վաշինգտոնը շարունակում է պատրաստ լինել անմիջականորեն համագործակցել Իրանի հետ՝ «իրանական միջուկային հարցի խաղաղ և երկարատև լուծմանը նպաստելու համար»։
Reuters-ը նշում է, որ ՄԱԿ-ի Անվտանգության խորհուրդը նախատեսում է օգոստոսի 29-ին փակ նիստ անցկացնել «Եվրաեռյակի» երկրների խնդրանքով։ ՄԱԿ-ի պատժամիջոցների վերականգնման գործընթացը կտևի 30 օր։ Միաժամանակ, Ռուսաստանը և Չինաստանն ավարտել են Անվտանգության խորհրդի բանաձևի նախագծի մշակումը, որը կերկարաձգի 2015 թվականի միջուկային համաձայնագիրը վեց ամսով։
Իրանը և «Եվրաեռյակը» մի քանի փուլով բանակցել էին միջուկային ծրագրի վերաբերյալ։ Եվրոպական երկրները պահանջել էին, որ Թեհրանը վերսկսի ՄԱԳԱՏԷ-ի ստուգումները միջուկային օբյեկտներում, այդ թվում՝ հարստացված ուրանի մեծ պաշարների հաշվառումը, ինչպես նաև Իրանի մասնակցությունը Միացյալ Նահանգների հետ բանակցություններին։ ԱՄՆ-ն և «Եվրաեռյակի» երկրները համաձայնության էին եկել օգոստոսի վերջը սահմանել որպես միջուկային համաձայնագրի կնքման վերջնաժամկետ:
