Euronews Business-ը մանրամասն ուսումնասիրել է նվազագույն աշխատավարձերը Եվրոպայում՝ համադրելով յուրաքանչյուր երկրում եվրոյի արժեքը և գնողունակությունը։
ԵՄ-ում միլիոնավոր աշխատողներ շարունակում են վաստակել նվազագույն աշխատավարձ, հայտնում է հոդվածի հեղինակ Սերվետ Յանատման։ Այդ շեմերը սահմանվում են երկրում կենսապահովման նվազագույն ցուցանիշի համապատասխանությամբ, չնայած կենսաապահովման զամբյուղի թնակացմանը կամ գնաճին զուգահեռ, նվազագույն աշխատավարձերը շատ հաճախ չեն բարձրացվում։
2025 թվականի հուլիսի դրությամբ ԵՄ-ում ամսական նվազագույն աշխատավարձը, առանց պահումների, տատանվում էր Բուլղարիայում 551 եվրոյից մինչև Լյուքսեմբուրգում 2704 եվրո՝ ըստ «Եվրոստատ»-ի։
ԵՄ թեկնածու երկրներից Ուկրաինան ունի ամենացածր նվազագույն աշխատավարձը՝ ընդամենը 164 եվրո։
ԵՄ հինգ երկրներ՝ Իտալիան, Դանիան, Շվեդիան, Ավստրիան և Ֆինլանդիան, ընդհանրապես չունեն ազգային նվազագույն աշխատավարձ։
Այսպիսով, նվազագույն աշխատավարձի զգալի տարբերություններ կան Եվրոպայում, և «Եվրոստատ»-ը երկրները բաժանում է երեք աշխատավարձի մակարդակի։ Euronews-ը ավելացրել է չորրորդ կատեգորիա, որը խմբավորում է 600 եվրոյից ցածր նվազագույն աշխատավարձ ունեցող երկրները և ներառում է ԵՄ թեկնածու երկրները։
Ամենաբարձր խմբում նվազագույն աշխատավարձը 1,500 եվրոյից բարձր է։ Բացի Ֆրանսիայից, որն առաջարկում է 1,802 եվրո, ամենաբարձր խմբի մյուս բոլոր երկրներում ամսական նվազագույն աշխատավարձը 2,000 եվրոյից բարձր է։ Բացի Լյուքսեմբուրգից, դրանց թվում են Իռլանդիան (2,282 եվրո), Նիդերլանդները (2,246 եվրո), Գերմանիան (2,161 եվրո) և Բելգիան (2,112 եվրո)։
Միջին խմբում, որ 1000-ից մինչև 1500 եվրո է աշխատավարձը, մի քանի երկրներ գտնվում են 1000 եվրոյի շեմից մի փոքր բարձր։ Ցածր խումբ է համարվում 600-ից մինչև 999 եվրո նվազագույն աշխատավարձը, շատ ցածր խումբ՝ 600 եվրոյից ցածր։
Մի քանի երկրներում, այդ թվում՝ ԵՄ անդամ մեկ երկրում, նվազագույն աշխատավարձը 600 եվրոյից ցածր է։ Այս ամենացածր խումբը հիմնականում կազմված է ԵՄ թեկնածու երկրներից։ Այն ներառում է Հյուսիսային Մակեդոնիան (584 եվրո), Թուրքիան (558 եվրո), Բուլղարիան (551 եվրո), Ալբանիան (408 եվրո), Մոլդովան (285 եվրո) և Ուկրաինան (164 եվրո)։
Եվրոպայում կա անվանական նվազագույն աշխատավարձերի ուժեղ աշխարհագրական բաժանում։ Սա առավել նկատելի է Արևմտյան և Արևելյան Եվրոպայի միջև։ Ընդհանուր առմամբ, չորս աշխատավարձային խմբերը արտացոլում են ԵՄ տարբեր տարածաշրջաններ։
Ամենաբարձր խմբի երկրները հիմնականում Արևմտյան և Հյուսիսային Եվրոպայում են։ Միջին խումբը ներառում է Հարավային և Կենտրոնական Եվրոպայի մի քանի երկրներ։ Ցածր և շատ ցածր խմբերը հիմնականում բաղկացած են Արևելյան Եվրոպայի, Բալկանյան և ԵՄ թեկնածու երկրներից։
