«Տաշիր» ընկերությունների խմբի նախագահ Սամվել Կարապետյանի եղբորորդին՝ Նարեկ Կարապետյանը, ուշադրություն է հրավիրել իր հորեղբոր նկատմամբ Հայաստանի և Ադրբեջանի իշխանությունների զուգահեռ գործողությունների վրա:
«2021 թվականի հունիսի 18-ին Ադրբեջանը Հայաստանին աջակցելու համար հետախուզում հայտարարեց Սամվել Կարապետյանի նկատմամբ: 2025 թվականի նույն օրը` հունիսի 18-ին, Հայաստանում կալանավորվեց Սամվել Կարապետյանը»,- Ֆեյսբուքի իր էջում գրել է Նարեկը։
Չորս տարի առաջ նշված օրն Ադրբեջանի դատախազությունը միջազգային հետախուզում էր հայտարարել ազգությամբ հայ մի շարք ռուսաստանաբնակ գործարարների, այդ թվում՝ «Տաշիր» ընկերությունների խմբի նախագահի նկատմամբ։
Հունիսի 19-ին դատարանը երկու ամսով կալանավորել էր Կարապետյանին: Նա հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները՝ աջակցություն հայտնելով եկեղեցուն, ինչից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ Վարչապետ Նիկոլ Փաշինյանը խիստ էր արձագանքել Կարապետյանի հայտարարությանը:
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
