Վրաստանի մաքսային տարածքում արգելափակված հայկական բեռների հետ կապված իրավիճակը Հայաստանի բիզնեսի համար «շատ վտանգավոր է», լրագրողների հետ զրույցում նշել է ՀՀ էկոնոմիկայի նախարար Գևորգ Պապոյանը:
Նա հայտարարել է, որ ի սկզբանե նախատեսվում էր իր այցը Թբիլիսի, սակայն վրացական կողմի նախաձեռնությամբ, դրա փոխարեն, հունիսի 6-ին Հայաստան կժամանի Վրաստանի գյուղատնտեսության նախարարը՝ իրավիճակի լուծման նախնական փաթեթով։
«Խոսակցությունը նրա մասին էր, որ պետք է լուծենք, ես գնամ։ Իրենք առաջարկեցին գալ։ Հունիսի 6-ին իմ գործընկերը կգա, և մենք այս հարցը կքննարկենք։ Հուսով եմ՝ ինչ-որ լուծում կգտնենք, որովհետև այն իրավիճակը, որ հիմա ունենք, շատ վտանգավոր է բիզնեսի, խաղողագործների, կոնյակագործների համար»,- ասել է Պապոյանը:
Նախարարի խոսքով՝ մտադիր է հանդիպումներ կազմակերպել տարբեր ձևաչափերով և «սենյակից դուրս չգալ՝ մինչև խնդրի լուծումը չգտնվի»:
Պատասխանելով ստեղծված իրավիճակի պատճառների մասին հարցին՝ Պապոյանն ասել է, որ վրացական կողմը տարբեր ժամանակներում գործարարների առաջ տարբեր խնդիրներ է դրել։ Նա մանրամասներ չի հայտնել՝ մտավախություն հայտնելով, որ դա կբարդացնի կողմերի բանակցությունները։
Ապրիլի կեսերից Ռուսաստան և Բալթյան երկրներ արտահանման համար նախատեսված հայկական կոնյակով և այլ ալկոհոլային խմիչքներով բեռնատարները, այդ թվում՝ Պռոշյանի կոնյակի գործարանի, «Շահնազարյան» գինու-կոնյակի տան և այլ ընկերությունների արտադրանքը, երկարատև ստուգումներ են անցնում տարանցիկ երկրում և մնում վրացական անցակետերում:
Մայիսի 13-ին և մայիսի 21-ին Հայաստանից կոնյակ արտահանողները բողոքի ակցիաներ էին իրականացրել ՀՀ-ում Վրաստանի դեսպանատան շենքի առջև՝ պահանջելով լուծում տալ իրենց ապրանքի արտահանման ժամանակ առաջացած խնդիրներին։ Էկոնոմիկայի նախարարը մայիսի 15-ին հայտարարել էր, որ, հավանաբար, կմեկնի հարևան երկիր՝ խնդիրը տեղում լուծելու նպատակով:
