Հայաստանի վարչապետի տիկին Աննա Հակոբյանը վերջին շաբաթվա ընթացքում սոցցանցային ակտիվություն է դրսևորում՝ մեկնաբանալով իրենց ընտանիքի, իր ղեկավարած «Իմ քայլը» հիմնադրամի «Կրթվելը նորաձև է» նախաձեռնության մասին քննադատությունները: Նրա գրառումներում, ի պատասխան տարբեր ընդդիմադիր գործիչների և սոցիալական ցանցի օգտատերերի հայտարարությունների, սակայն, տեղ են գտել այնպիսի արտահայտություններ, ինչպիսիք են՝ «ոջիլ», «էշ», «տխմար», «ինտելեկտուալ ղզիկներ», «անդաստիարակ»:
Ինքը՝ Հակոբյանը, բոլոր նրանց, ովքեր քննարկում են, թե արդյոք ճի՞շտ է վարչապետի տիկնոջ նման վարքագիծը կամ էթիկայի սահմաններում է դա, հորդորել է. «Ձեր գործով զբաղվեք, կենտրոնացեք ձեր աշխատանքային պարտականություններն ավելի լավ կատարելու վրա»։
Armenia Today-ի նկարահանող խումբը քաղաքացիներից հետաքրքրվել է, թե ինչպե՞ս են վերաբերվում վարչապետի տիկնոջ արտահայտություններին:
Հարցման մասնակից քաղաքացիների մեծամասնությունը քննադատել է նման վարքագիծը։
«Դե որ մակարդակ ունենար, այդպիսի բաներ չէր ասի: Ամբողջ աշխարհի վարչապետը, կանայք ո՞րն է ինչ արտահայտվում»,- պատասխանել է քաղաքացիներից մեկը:
«Անվայել է, իրավունք չունի կոպտելու որևէ մեկին»,- նշել է հարցման մեկ այլ մասնակից։
Նրանցից մի քանիսն ասել են, որ չեն հետևում վարչապետի կնոջ գրառումներին, տեղյակ չեն:
Մասնակիցներից մեկն էլ հետևյալ կերպ է արձագանքել. «Նախկին իշխանությունների ժամանակ առաջին տիկիններն ամեն հարցում իրենց ճի՞շտ էին պահում: Նախկին տիկիններն էլ որոշ բաներ անում էին, ուղղակի չէին բարձրաձայնվում իրենց արածները: Հիմա այստեղ բարձրաձայնվում է, դրա համար էլ պիտակավորված է ինքն արդեն»:
Մանրամասները՝ Armenia Today-ի տեսանյութում
