Փաստաբան Ռոման Բաղդասարյանը հրապարակել է Արցախի Հանրապետության նախագահ Սամվել Շահրամանյանի հրամանագիրը, որով նա անվավեր է ճանաչել 2023 թվականի սեպտեմբերի 26-ին Արցախը լուծարելու մասին հրամանագիրը։
Երիցյանը տեղեկացրել է, որ Շահրամանյանը հրամանագիրն ստորագրել է Երևան տեղափոխվելուց հետո՝ «ինչ-որ հրամանագրով Արցախը լուծարված լինելու հարցին լուրջ վերաբերողների համար և հետագա շահարկումներից խուսափելու նպատակով»։ Փաստաբանի խոսքով՝ Շահրամանյանը 2-րդ հրամանագրի մասին պաշտոնական նամակով տեղեկացրել է Հայաստանի իշխանությանը:
«Չնայած երկու հրամանագրերը որևէ իրավական ուժ չունեն, երկուստեք հակասում են թե՛ Արցախի մայր օրենքին, թե՛ հրամանագրից բարձր իրավաբանական ուժ ունեցող այլ իրավական ակտերի դրույթներին, ուժի մեջ չեն մտել, որևէ հետևանք անգամ չեն կարող առաջացնել, այնուամենայնիվ, հրապարակելով հրամանագիրը՝ բոլորին խնդրում եմ Արցախը լուծարված լինելու մասին այլևս չխոսել»,- գրել է փաստաբանը։
Նա հիշեցրել է, որ Արցախի լուծարման մասին հրամանագիրը հիմք ընդունելով՝ ՀՀ-ում տարբեր անձանց, այդ թվում՝ արցախյան համայնքների ղեկավարներին և ավագանու անդամներին առաջադրվել են քրեական մեղադրանքներ։
«Այդ հիմքով պատճառաբանել են, որ Արցախի պետությունն ու համայնքները լուծարված են, իսկ պաշտոնատար անձանց լիազորություններն էլ՝ դադարեցված, հետևաբար նրանց կողմից այս կամ այն լիազորությունն իրականացնելը քրեորեն պատժելի է։ Հիշեցնեմ՝ Ադրբեջանը շուրջ 30 տարի Շուշիի, Աղդամի և այլ համայնքների ղեկավարներ է ունեցել, ուստի տարածքային կորստով Արցախի էջը փակված մի՛ համարեք։ Մենք մերը հետ ենք ստանալու»,- եզրափակել է Երիցյանը։
2023-ի սեպտեմբերի 19-20-ն Ադրբեջանի ձեռնարկած ռազմական ագրեսիայից հետո Շահրամանյանը սեպտեմբերի 28-ին հրամանագիր էր ստորագրել Արցախի բոլոր պետական կառույցներն ու կազմակերպությունները մինչև 2024-ի հունվարի 1-ը լուծարելու մասին։ 2023-ի դեկտեմբերին Արցախի նախագահը հայտարարել էր, որ իրավական դաշտում պետական մարմինների լուծարում նախատեսող փաստաթուղթ գոյություն չունի։
Կարդացեք նաև՝
«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն։
