ԱՄՆ կառավարության արդյունավետության դեպարտամենտի (DOGE) գործունեությունը, որը վերահսկվում է ձեռնարկատեր Իլոն Մասկի կողմից, Սպիտակ տանը հանգեցրել է պառակտման, գրում է ՏԱՍՍ-ը՝ վկայակոչելով ABC News-ին։
«Ոմանց դա դուր է գալիս, ոմանք սպասում են Մասկի հեռանալուն, սակայն նա մոտ ապագայում ոչ մի տեղ չի պատրաստվում գնալ»,- գրում է կայքը։
Նշվում է, որ որոշ բարձրաստիճան պաշտոնյաներ դժգոհություն են հայտնել Մասկի գործունեության վերաբերյալ և կարծում են, որ նրա մեթոդները դուրս են վերահսկողությունից։
«Սակայն Մասկն ունի նաև կողմնակիցներ, այդ թվում՝ Սպիտակ տան աշխատակազմի ղեկավարի տեղակալ Սթիվեն Միլլերը։ Այդուհանդերձ, թեև Սպիտակ տանը ոմանք հիասթափված են Մասկի՝ Վաշինգտոնում անցկացրած առաջին մի քանի շաբաթների ասպեկտներից, նրանք վարանում են միջամտել՝ հաշվի առնելով նրա հսկայական հարստությունը և քաղաքական ազդեցությունը»,- ասվում է հոդվածում:
2024թ․ նոյեմբերին ԱՄՆ նախագահ Դոնալդ Թրամփը Մասկին (SpaceX-ի և Tesla-ի հիմնադիր) և Վիվեկ Ռամասվամիին (Roivant Sciences կենսատեխնոլոգիական ընկերության ղեկավար) նշանակել էր կառավարության արդյունավետության նոր դեպարտամենտի (DOGE) ղեկավարներ։
