ԿԳՄՍ նախարարությունը դիմել է «Դոպինգ Սփեյս» գործակալությանը՝ խնդրելով վերադարձնել Սնուփ Դոգի չեղարկված ելույթի համար վճարված գումարը, լրագրողներին ասել է նախարար Ժաննա Անդրեասյանը։ Ըստ նրա, դեռևս արձագանք չկա։
«Համապատասխան խնդրանքով կապվել ենք կազմակերպության հետ և այս պահին սպասում ենք կազմակերպության պատասխանին։ Դեռ այդ գործընթացում ենք, և ինքներս կտեղեկացնենք ձեզ։ Պայմանագրի դրույթները հստակ են և վերաբերում են ամբողջ գումարին»,- պարզաբանել է նախարարը։
Անդրեասյանը հիշեցրել է, որ համերգը չէր կայացել Արցախի վրա Ադրբեջանի հարձակման պատճառով։
«Թե ինչո՞ւ տեղի չունեցավ համերգը, ցավոք, այդ ողբերգական իրադարձություններն էին, որոնք, բնականաբար, այլ օրակարգ և այլ առաջնահերթություններ էին ձևավորել»,- ընդգծել է նա։
Անդրեասյանը հավելել է, որ կազմակերպող ընկերությունը բանակցություններ է վարում արտիստի հետ, իսկ ԿԳՄՍ-ն չի հանդիսանում իրականացնող մարմին։
«Ընկերությունից տեղեկացել էինք, որ բանակցություններ են ընթանում համերգը նորից կազմակերպելու վերաբերյալ։ Ի վերջո, ստացել ենք այն իրավիճակը, որ չի ստացվել կազմակերպել 2024-ի ընթացքում, պայմանագրի ժամկետն սպառվել է, և մենք դիմել ենք ամբողջ գումարը վերադարձնելու համար»,- ասել է նախարարը։
«Համաշխարհային աստղի հայաստանյան հյուրախաղեր» երաժշտական նախագծի շրջանակներում 2023-ի օգոստոսի 11-ին Հայաստանի կառավարությունը 6 մլն դոլար էր հատկացրել «Դոպինգ Սփեյս» ընկերությանը՝ ռեփերի՝ Երևանում 2023-ի սեպտեմբերի 23-ին կայանալիք համերգի անցկացման համար: 2023-ի սեպտեմբերի 21-ին ՀՀ կառավարությունը համերգը հետաձգելու որոշում էր կայացրել ՝ սեպտեմբերի 19-ին Արցախի դեմ Ադրբեջանի ձեռնարկած լայնածավալ ագրեսիայով հարձակվելուց հետո պայմանավորված:
Համերգի համար ՀՀ կառավարության որոշմամբ՝ ՀՀ պետական բյուջեի միջոցներից «Մշակութային միջոցառումների իրականացնում» ծրագրի շրջանակներում գանձապետարանում հաշվառվել էր 2,3 մլրդ դրամ գումարի պայմանագիր։ ՀՀ ֆինանսների նախարարությունից հայտնել էին, որ ռեփերը գումարը չի վերադարձրել:
