Վարչապետին առընթեր Հայաստանի պետական անվտանգության ծառայության զինծառայողները կյանքին կամ առողջությանը պատճառված վնասի փոխհատուցում կստանան։ Այս որոշումն ընդունվել է կառավարության փետրվարի 6-ի նիստում։
2017 թվականի փետրվարի հրամանագրով նման փոխհատուցում են ստանում այն զինծառայողները, որոնց կյանքին կամ առողջությանը վնաս է պատճառվել հանրապետության պաշտպանության մարտական գործողություններին մասնակցելիս կամ հակառակորդի հետ շփման գծում մարտական հերթապահություն կատարելիս։
Նախագիծը մշակած Պետական պահպանության ծառայությունը նշել է, որ այն չի նախատեսում պետական բյուջեի ծախսերի ավելացում։ Նախագծի ընդունման առնչությամբ բացակայում է այլ իրավական ակտերի նախագծերի ընդունման անհրաժեշտությունը:
Պետական պահպանության ծառայությունն ստեղծվել է վարչապետի աշխատակազմին կից՝ քաղծառայողներին սպառնացող վտանգները կանխատեսելու և բացահայտելու, աշխատանքի և ճանապարհորդության ընթացքում նրանց անվտանգությունն ապահովելու նպատակով։
