Երևանը կարող է կորցնել բոլոր արտոնությունները, որոնք ունի Եվրասիական տնտեսական միության (ԵԱՏՄ) շրջանակում, հայտարարել է Ռուսաստանի արտգործնախարար Սերգեյ Լավրովը։
Լավրովի խոսքով՝ Ռուսաստանի և Հայաստանի հարաբերությունները շարունակում են մնալ մտերիմ ու դաշնակցային, սակայն դրանք, միաժամանակ, նրա գնահատմամբ, «բարդ են»։
Նա նաև հայտարարել է, որ Բրյուսելը ձգտում է թեկնածու երկրներին ամբողջությամբ ներառել ԵՄ արտաքին քաղաքական գծում, որը ռուս նախարարը բնութագրել է որպես «բացահայտ, ծայրահեղ և ագրեսիվ ռուսատյացություն»։ Լավրովը հավելել է, որ Մոսկվան իր «դաշնակցային պարտքն» է համարում հայկական կողմին բացատրել ԵԱՏՄ-ի և Եվրամիության ինտեգրացիոն գործընթացների առանձնահատկությունները։
Լավրովը նաև հայտարարել է, որ Մոսկվայի և Երևանի հարաբերությունները կարող են քննարկվել Եվրասիական բարձրագույն տնտեսական խորհրդի գագաթնաժողովում, որը մայիսի վերջին կանցկացվի Ղազախստանում։
ՌԴ ԱԳՆ ղեկավարը հիշեցրել է, որ վարչապետ Նիկոլ Փաշինյանն ավելի վաղ տեղեկացրել էր, որ չի կարող մասնակցել ԵԱՏՄ առաջնորդների հանդիպմանը՝ նախընտրական զբաղվածության պատճառով։
«Դա, իհարկե, տխուր կլիներ, որովհետև դա լավ հնարավորություն է քննարկելու օդում կախված հարցերը»,- ռուսական ԶԼՄ-ների հետ զրույցում ասել է Լավրովը։
ՌԴ նախագահ Վլադիմիր Պուտինը մայիսի 9-ին հայտարարել էր, որ Հայաստանը պետք է հնարավորինս շուտ կողմնորոշվի ԵՄ-ին կամ ԵԱՏՄ-ին անդամակցության հարցում։ Այդ դեպքում, ըստ նրա, հնարավոր է «փափուկ և ինտելիգենտ ամուսնալուծության» ուղին։ Փաշինյանն արձագանքել էր՝ նշելով՝ քանի դեռ հնարավոր է այդ երկու օրակարգը համատեղել, Երևանը կհամատեղի:
Ավելի ուշ ՌԴ փոխվարչապետ Ալեքսեյ Օվերչուկն զգուշացրել էր, որ ՀՀ-ն շատ մոտ է այն կետին, երբ ՌԴ-ն ստիպված կլինի այլ կերպ կառուցել տնտեսական հարաբերությունները։ Ըստ ՌԴ անվտանգության խորհրդի քարտուղարի տեղակալ Ալեքսեյ Շևցովի՝ Հայաստանը կկորցնի իր ՀՆԱ-ի մոտ 23%-ը Եվրամիությանն անդամակցելու դեպքում։
Կարդացեք նաև՝
Սիմոնյանը ՀՀ-ի՝ «2 աթոռի» նստելու ձգտման հայտարարությունն «էմոցիոնալ» է անվանել
