Forbes-ի վարկածով աշխարհի ամենահարուստ մարդկանց վարկանիշային ցուցակում ընդգրկվել է հայազգի 9 գործարար։ Պարբերականը 2026-ի ցուցակում ընդգրկել է 3428 միլիարդատեր, ինչը 400-ով ավելին է, քան 2024 թվականին: Նրանք հարուստ են, քան երբևէ՝ 28,9 տրիլիոն դոլար ընդհանուր կարողությամբ, ինչը 2025 թվականի համեմատ աճել է գրեթե 12,8 տրիլիոն դոլարով:
Հայերից ամենահաջողակը գործարար Ալբերտ Ավդոլյանն է, ով Forbes-ի համաշխարհային ցուցակում զբաղեցրել է 557-րդ տեղը։ Yota ընկերության հիմնադիրն իր կարողությունը մեկ տարում 5 մլրդ դոլարից դարձրել է 7,1 մլրդ դոլար։ Նրան են պատկանում հեռավորարևելյան և սիբիրյան ածխի արդյունահանման և գազի ընկերությունները։ Ավդոլյանն իր կապիտալն ստացել է ռուսական Megafon և Yota օպերատորների բաժնետոմսերի վաճառքից, նշում է Forbes-ը։ 2022 թվականին նա սկսել էր մասնավոր երկաթուղու կառուցումը Յակուտիայի ածխի հանքավայրերից մինչև ապագա նավահանգիստ Օխոտսկի ծովի ափին, որը կոչվում է «Խաղաղօվկիանոսյան երկաթուղի»: Դրա երկարությունը մոտ 500 կիլոմետր է։
Ավդոլյանին հաջորդում է արգենտինահայ գործարար և Հայաստանի ազգային հերոս Էդուարդո Էռնեկյանը, ում կարողությունը 3,4 մլրդ դոլարից հասել է 4,8 մլրդ դոլարի։ Նա զբաղեցրել է ցուցակի 891-րդ տեղը: 2025 թվականին նա զբաղեցրել էր 1072-րդ հորիզոնականը։ Էռնեկյանն սկզբում աշխատել է տեքստիլ արդյունաբերության մեջ, ապա 1980-ականներին տեղափոխվել է կաբելային հեռուստատեսություն, իսկ 1990-ականներին ստացել էր 750 մլն դոլար արգենտինական Cablevision հեռուստաընկերության վաճառքից։ Corporacion America-ի հետ միասին Էռնեկյանն ունի ավելի քան 50 օդանավակայան ամբողջ աշխարհում, որոնց եկամուտը գերազանցում է 1,5 մլրդ դոլարը: Նրա ակտիվները ներառում են Արգենտինայում նավթի և գազի արդյունահանման օբյեկտներ, հանքավայրեր և խողովակաշարեր:
Ցուցակում հայերի շրջանում երրորդ տեղում է «Տաշիր» ընկերությունների խմբի հիմնադիր նախագահ և «Ուժեղ Հայաստան» կուսակցության վարչապետի թեկնածու Սամվել Կարապետյանը, որը վարկանիշում զբաղեցնում է 1044-րդ հորիզոնականը։ Կարապետյանի կարողությունը 3,2 մլրդ դոլարից աճել է ու դարձել 4,1 մլրդ դոլար։ Հայաստանում «Տաշիր» ընկերությունների խմբի ակտիվների թվում է «Հայաստանի էլեկտրական ցանցեր» ընկերությունը, որը պետության վերահսկողության տակ վերցնելու գործընթաց էր սկսվել 2025 թվականի օգոստոսին՝ նրա կալանավորումից հետո։
Վարկանիշում 1376-րդ հորիզոնականն զբաղեցրել է Սերգեյ Գալիցկին (ազգանունը մինչ ամուսնությունը՝ Հարությունյան)։ Magnit մանրածախ ցանցի հիմնադրի և «Կրասնոդար» ֆուտբոլային ակումբի նախագահի կարողությունը գնահատվում է 3,2 մլրդ դոլար, ինչը 2025 թվականի համեմատ չի աճել: Գալիցկին իր հայկական արմատների մասին խոսել էր «Մայակ» ռադիոկայանին տված հարցազրույցում։
«Ես 75%-ով էթնիկ ռուս եմ, 25%-ով՝ հայ, քանի որ մեծացել եմ ռուսական միջավայրում, ցավոք, հայերեն չգիտեմ, այնուամենայնիվ, հպարտ եմ իմ հայկական արմատներով»,- 2013-ին ասել էր նա:
Հայկական արմատներով ռուս և անգլիացի գործարար Անդրեյ Անդրեևն (Օհաջանյանց) զբաղեցրել է 1611-րդ տեղը։ Նրա կարողությունը 2,1 մլրդ դոլարից աճել է մինչև 2,6 մլրդ դոլար։ 2004 թվականից Անդրեևն ստեղծել է հինգ կայք և հավելված՝ առցանց ծանոթությունների համար՝ Mamba, Badoo, Bumble, Chappy և Lumen: Նրա ամենահաջողված նախագիծն ԱՄՆ-ում ստեղծված Bumble-ն է։ 2019-ի նոյեմբերին Անդրեևը վաճառել էր իր բաժնետոմսերը Bumble և Badoo-ում Blackstone Group-ին, որը դրանք գնահատել էին 3 մլրդ դոլար։
Հայազգի գործարար Քիմ Քարդաշյանը 2019-րդ տեղից իջել է 2117-րդ հորիզոնական, կարողությունը 1,7 մլրդ դոլարից դարձել է 1,9 միլիարդ։ Քարդաշյանը համբավ է ձեռք բերել Keeping Up With the Kardashians ռեալիթի շոուի թողարկումից հետո և կարողացել է այն վերածել տասը նիշանոց կարողության։ 2023 թվականի հունիսին Քարդաշյանն ու նրա խորթ քույրը՝ Քայլի Ջեները, ընդգրկվել էին Forbes-ի կողմից Ամերիկայի 100 ամենահարուստ ինքնուրույն հաջողության հասած կանանց ցուցակում։
Քարդաշյանի Skims ապրանքանիշը գնահատվել է 5 մլրդ դոլար` (2023 թվականի 4 միլիարդի դիմաց-AT) Goldman Sachs Alternatives-ից 225 մլն դոլարի ֆինանսավորումից հետո։ Ընկերությունը մոտենում է տարեկան 1 մլրդ դոլարի վաճառքին և նախատեսում է օգտագործել կապիտալն ԱՄՆ-ում ու միջազգային խանութներում ընդլայնման, արտադրանքի նորարարության և դիվերսիֆիկացման համար։ Skims-ն այժմ ունի 18 խանութ ԱՄՆ-ում և 1-ը՝ Մեքսիկայում, ևս 1-ը կբացվի 2026 թվականին։ Skims-ն ընդլայնում է իր գործընկերությունը Nike-ի հետ՝ թողարկելով NikeSkims-ը, որոնք վաճառվել են մի քանի ժամվա ընթացքում, և աստիճանաբար ընդլայնվում է սպորտային հագուստի շուկայում։
Ամերիկաբնակ կանադահայ գործարար, բիոտեխնոլոգիական Moderna ընկերության համահիմնադիր Նուբար Աֆեյանն զբաղեցրել է 2177-րդ տեղը՝ նրա կարողությունը 1,2 մլրդ դոլարից աճել է մինչև 1,9 մլրդ դոլար։ Նա նաև Flagship Pioneering-ի հիմնադիրն ու գործադիր տնօրենն է, որը Մասաչուսեթս նահանգի Քեմբրիջ քաղաքում հիմնված գիտությունների նորարարական ընկերություն է: Աֆեյանն օգնել է հիմնել ավելի քան 70 պետական և մասնավոր ընկերություն առողջապահության և կենսաբանության բնագավառներում: Բացի Moderna-ում իր բաժնետոմսերից, նա նաև բաժնետոմսեր ունի Միացյալ Նահանգների ավելի քան մեկ տասնյակ հրապարակային բիոտեխնոլոգիական ընկերություններում: Աֆեյանը միլիարդատեր է դարձել կորոնավիրուսի դեմ պատվաստանյութի արտադրության շնորհիվ:
Ռուսական Fix Price ռիթեյլերի համահիմնադիր Արտյոմ Խաչատրյանը վարկանիշային աղյուսակում զբաղեցրել է 2274-րդ տեղը։ Նրա կարողությունը գնահատվում է 1,8 մլրդ դոլար՝ նախորդ տարվա 1,6 միլիարդի փոխարեն, որն անփոփոխ է 2024 թվականի համեմատ: Fix Price-ը ներառում է ավելի քան 4000 խանութ Ռուսաստանում, Ղազախստանում, Վրաստանում, Բելառուսում, Լատվիայում, Ղրղզստանում և Ուզբեկստանում:
2858-րդ տեղն է զբաղեցրել Ադրբեջանի կողմից ձերբակալված Արցախի նախկին պետնախարար, Բաքվում 20 տարով ապօրինի դատապարտված գործարար Ռուբեն Վարդանյանը։ Նրա կարողությունը գնահատվում է 1,3 մլրդ դոլար՝ նախորդ տարվա 1,2-ի փոխարեն։ Forbes-ը բացատրել է, որ 2022 թվականի նոյեմբերին Վարդանյանն իր բիզնես ակտիվները փոխանցել էր ընտանեկան թրասթին։ Վարդանյանը դարձել է ՀՀ քաղաքացիություն ունեցող միակ միլիարդատերը Forbes-ի համաշխարհային վարկանիշում։ Դա պայմանավորված է նրանով, որ նա 2021 թվականին ստացել էր հայկական անձնագիր, իսկ 2022 թվականին հրաժարվել էր ռուսականից։ Մինչ այդ ամերիկյան ամսագիրը Վարդանյանին դասում էր ռուս միլիարդատերերի շարքին։
