Հունգարիայի վարչապետ Վիկտոր Օրբանը խորհրդարանական ընտրությունների նախնական արդյունքներն իր կուսակցության համար ցավոտ է անվանել, հայտնել է «ՌԻԱ Նովոստին»։
«Ընտրությունների արդյունքները պարզ են, թեև վերջնական չեն»,- ասել է նա՝ դիմելով իր կողմնակիցներին։
Օրբանը հայտարարել է, որ իր «Ֆիդես» կուսակցությունը կշարունակի ծառայել երկրին՝ նույնիսկ որպես ընդդիմություն։
«Անկախ նրանից, թե ինչ տեղի կունենա, նույնիսկ ընդդիմության մեջ, մենք կծառայենք մեր հայրենիքին և մեր ազգին»,- հայտարարել է նա՝ դիմելով իր կողմնակիցներին «Ֆիդես»-ի գլխավոր գրասենյակում։
Օրբանը շնորհավորել է «Տիսա» կուսակցությանը հաղթանակի կապակցությամբ։
Հունգարիայի ընտրական գրասենյակի տվյալներով՝ խորհրդարանական ընտրություններում, նախնական տվյալներով, առաջատարը Հունգարիայի ընդդիմադիր «Տիսա» կուսակցությունն է՝ ապահովելով 199 տեղերից 138-ը։ Մշակվել է ձայների 72,44%-ը։
Օրբանի գլխավորած իշխող «Ֆիդես» և «Քրիստոնեա-դեմոկրատական ժողովրդական կուսակցություն» դաշինքը, նախնական տվյալներով, կանխատեսվում է, որ ընտրություններում կապահովի 54 տեղ, իսկ ծայրահեղ աջ «Մեր հայրենիք» կուսակցությունը կստանա 7 տեղ։
Օրբանը վարչապետի պաշտոնը զբաղեցրել էր 1998-2002 թվականներին, ապա վերադարձել 2010-ին և այդ ժամանակից ի վեր՝ պաշտոնավարում է չորրորդ ժամկետն անընդմեջ։ 2022 թվականի ընտրությունների արդյունքներով՝ «Ֆիդես»-ի և Քրիստոնեադեմոկրատական ժողովրդական կուսակցության կոալիցիան ստացել էր խորհրարանի տեղերի մոտ երկու երրորդը։
