Tesla-ի ղեկավար և xAI ստարտափի հիմնադիր Իլոն Մասկը դարձել է պատմության մեջ առաջին մարդը, որի զուտ կարողությունը կազմում է 500 միլիարդ դոլար՝ Forbes-ի տվյալներով, հաղորդում է Reuters-ը:
Forbes-ի միլիարդատերերի ցուցանիշի համաձայն՝ Մասկի ունեցվածքը կազմել է 500,1 միլիարդ դոլար՝ ըստ արևելյան ժամանակով ժամը 16:15-ի։
Tesla ընկերության բաժնետոմսերն այս տարի աճել են ավելի քան 14%-ով, և միայն չորեքշաբթի բարձրացել 3,3%-ով՝ ավելացնելով Մասկի զուտ ունեցվածքն ավելի քան 6 միլիարդ դոլարով։
Տարվա սկզբի տատանումներից հետո Tesla-ի բաժնետոմսերն սկսել են աճել, քանի որ ներդրողների տրամադրությունը բարելավվել է՝ Մասկի ուշադրությունը կրկին իր ընկերություններին ուղղելու արդյունքում, գրում է Reuters-ը:
Forbes-ի ցուցակի երկրորդ տեղում է Oracle-ի հիմնադիր Լարի Էլիսոնը՝ մոտ 350,7 միլիարդ դոլար զուտ ունեցվածքով։
Մասկն ակտիվորեն աջակցում էր ԱՄՆ նախագահ Դոնալդ Թրամփին ինչպես նախընտրական շրջանում, այնպես էլ նախագահության սկզբում, սակայն մայիսի 29-ին հայտնել էր ԱՄՆ վարչակազմը լքելու մասին, որից հետո նրա և Թրամփի միջև հրապարակային քննադատություններ էին սկսվել:
