ԵԱՏՄ անդամ պետություններն ստորագրել են «Եվրասիական տնտեսական ուղի» ծրագիրը 2030-2045 թվականների համար։ Այս և Եվրասիական բարձրագույն տնտեսական խորհրդի նիստից հետո ստորագրված ևս 19 փաստաթուղթ հրապարակվել է Կրեմլի կայքում, հայտնել է ՏԱՍՍ-ը։
Եվրասիական տնտեսական ուղին գործողությունների ծրագիր է ԵԱՏՄ շրջանակներում տնտեսական գործընթացների հետագա զարգացման մասին հռչակագրի իրականացման համար՝ մինչև 2030-2045 թվականները։
Բացի այդ, որոշում է ստորագրվել Ուզբեկստանի հետ բանակցություններ սկսելու մասին՝ ԵԱՏՄ անդամ պետությունների և Հանրապետության միջև մաքսային սահմաններով միջազգային մակարդակով տեղափոխվող ապրանքների և տրանսպորտային միջոցների վերաբերյալ տեղեկատվության փոխանակման համաձայնագիր կնքելու համար։
Ստորագրվել են նաև որոշումներ միջնաժամկետ հեռանկարում միության հիմնական գործընկերների հետ առևտրատնտեսական համագործակցության զարգացման մոտեցումների, միության 2026 թվականի բյուջեի և ԵԱՏՄ անդամ պետությունների 2026-2027 թվականների մակրոտնտեսական քաղաքականության հիմնական ուղեցույցների վերաբերյալ։
Մնացած փաստաթղթերը վերաբերում են ԵԱՏՄ-ի 2026 թվականի միջազգային գործունեության հիմնական ոլորտներին՝ զբոսաշրջությանը, ապրանքների նկատմամբ պահանջների խախտման համար պատասխանատվությանը և Ինդոնեզիայի հետ ազատ առևտրի համաձայնագրին։
Դեկտեմբերի 21-ին Սանկտ Պետերբուրգում անցկացվել էր Եվրասիական բարձրագույն տնտեսական խորհրդի նիստը, իսկ դեկտեմբերի 22-ին տեղի կունենա ԱՊՀ ոչ պաշտոնական գագաթնաժողովը։ ՌԴ նախագահի մամուլի խոսնակ Դմիտրի Պեսկովն ավելի վաղ հայտնել էր, որ գագաթնաժողովի ընթացքում ՌԴ նախագահ Վլադիմիր Պուտինն առանձին շփումներ կունենա ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ։
