«Տաշիր» ընկերությունների խմբի նախագահ Սամվել Կարապետյանն իր փաստաբանական թիմի միջոցով հանդես է եկել հայտարարությամբ, որում նա բացահայտել է իր դատավարության մանրամասները։
Նա ընդգծել է, որ իր դեմ մեղադրանք առաջադրած քննիչի և դատախազի կեցվածքն ու հույզերը վկայում էին, որ մեղադրանքներն առաջադրվել են հարկադրանքի տակ։ Միևնույն ժամանակ, Կարապետյանը դատավորի վիճակը բնութագրել է որպես «կախյալ և անզոր»։
«Իմ աչքերով տեսա իր իսկ մեղադրանքն ակնհայտ ստիպողաբար առաջադրած քննիչի հուզված վիճակը՝ դատարանի կողմից ինձ կալանավորելու որոշումը հրապարակելուց հետո, փորձառու դատախազի անմխիթար վիճակը՝ ամբողջ դատավարության ընթացքում: Եվ վերջապես, իմ աչքերով տեսա կոտրված դատավորի կեցվածքը, ով դատավարության ընթացքում իբր զարմանքով, տեղ-տեղ արհամարհանքով, ունկնդրում էր քննիչի և դատախազի բերած ապօրինի մեղադրանքն ու սնանկ փաստարկները՝ դրանով փորձելով դրսևորել կարծես անկողմնակալ, անկախ վարքագիծ: Այնուհետև չորս ժամ խորհրդակցական սենյակում գտնվելուց հետո ցույց տվեց, որ նա կախյալ է և անզոր: Պայքարելու ենք»,- ասվում է հայտարարությունում:
Կարապետյանը հավելել է, որ այն օրը, երբ կայացվել էր իրեն ձերբակալելու որոշում, իր կյանքի ամենահետաքրքիր օերերից մեկն էր: Նա շեշտել է, որ չնայած այդ ամենին, շուտով դատարաններն անկախ են լինելու։
«Պայքարելու ենք»,- իր ուղերձը եզրափակել է Կարապետյանը։
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների արշավը, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ Վարչապետը խիստ էր արձագանքել Կարապետյանի հայտարարությանը:
Խուզարկության մեկնարկից մոտ ութ ժամ անց՝ գիշերը ժամը երեքին, Սամվել Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
Հունիսի 19-ին դատարանը երկու ամսով կալանավորել էր Կարապետյանին: Հավելենք, որ դատավարությունը, ներառյալ՝ դատավճռի հրապարակումից առաջ դատավորի գրեթե չորս ժամ տևողությամբ խորհրդակցությունը, տևել է ավելի քան ութ ժամ: Armenia Today-ը լսումները հեռարձակել է ուղիղ եթերով:
Կարդացեք նաև՝
ՔԿ-ն Սամվել Կարապետյանին կալանավորելու միջնորդություն է ներկայացրել դատարան
