Ամերիկացի քրիստոնյա առաջնորդների կոալիցիան նամակ է հղել ԱՄՆ նախագահ Դոնալդ Թրամփին՝ խնդրելով վճռական քայլեր ձեռնարկել ադրբեջանական գերության մեջ գտնվող 24 պատանդների ազատ արձակման համար։
Նրանց թվում են 23 հայ քրիստոնյա և քրիստոնեություն ընդունած մեկ ադրբեջանցի։ Հատկապես մտահոգիչ է 21-օրյա հացադուլից հետո ծայրահեղ թուլացած Արցախի նախկին պետնախարար Ռուբեն Վարդանյանի վիճակը, ընդգծել են նրանք։
Նամակն ստորագրել են Ամերիկյան երազանքի կենտրոնի նախագահ դոկտոր Ալվեդա Քինգը, Ռոբերտսոնի կառավարման դպրոցի դեկան Միշել Բախմանը և IRF գագաթնաժողովի համանախագահ, դեսպան Սեմ Բրաունբեքը:
Իրենց ուղերձում առաջնորդները նշել են խոշտանգումների և պատանդների նկատմամբ սիստեմատիկ չարաշահումների հավաստի ապացույցների մասին: Նրանք ընդգծել են, որ իրենք Թրամփի վարչակազմին ճգնաժամի լուծման բանալին են համարում և կոչ են արել անհապաղ քայլեր ձեռնարկել՝ կյանքեր փրկելու համար:
«Հավատում ենք, որ միայն դուք կարող եք փրկել այս քրիստոնյա պատանդներին: Մոտ երկու տարի առաջ Ադրբեջանն էթնիկ զտումներ է իրականացրել իր պատմական հայրենիքում ապրող ավելի քան 120 հազար քրիստոնյա հայերի նկատմամբ, և Բայդենի վարչակազմը որևէ քայլ չի ձեռնարկել: Դրանից հետո 23 հայ քրիստոնյա և մեկ ադրբեջանցի քրիստոնյա ենթարկվել են կանոնավոր խոշտանգումների։ Կարմիր խաչի միջազգային կոմիտեն՝ միակ կազմակերպությունը, որին թույլ է տրված վերահսկել նրանց վիճակը, վերջերս հարկադրված լքել է երկիրը»,- ասվում է նամակում։
Նամակի հեղինակները նաև երախտագիտություն են հայտնել Թրամփին՝ Հայաստանին և հալածված քրիստոնյաներին նախկինում ցուցաբերած աջակցության համար։
«Շնորհակալություն քարոզարշավի ընթացքում Հայաստանին և հալածված քրիստոնյաներին ցուցաբերած աջակցության համար։ Ձեր հայտարարությունը հզոր էր և հստակ ուղերձ հղեց նրանց, ովքեր ձգտում են խաթարել Հայաստանի անվտանգությունը և նրա հարուստ քրիստոնեական ժառանգությունը՝ որպես պատմության մեջ քրիստոնեություն ընդունած առաջին երկրի», ասվում է նամակում:
Առաջնորդները հիշեցրել են 2024 թվականի հոկտեմբերի 23-ին Թրամփի գրառումը Truth Social-ում, որտեղ դատապարտում էր փոխնախագահ Քամալա Հարրիսի անգործությունը՝ կապված կապված (Արցախում) ճգնաժամի հետ և նշել, որ «աշխարհի քրիստոնյաներն ապահով չեն լինի, եթե Հարրիսը դառնա Միացյալ Նահանգների նախագահ» և, երբ ինքը դառնա նախագահ, կպաշտպանի հալածված քրիստոնյաներին, կդադարեցնի բռնությունն ու էթնիկ զտումները, և կվերականգնի խաղաղությունը Հայաստանի և Ադրբեջանի միջև։
2024-ի դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին Բաքվում սկսվել էին Արցախի առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, Արցախի նախկին պետնախարար Ռուբեն Վարդանյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
